Shillong, Jymmang, 26: U MLA jong ka Ranikor Constituency Bah Pius Marwein ha ka 23 tarik mynta u bnai u la pynhap pyrda ïa ka jingrakhe Jubili Rupa jong ka Royal Brother’s SSA Lower Primary School, Mawkyndeng, Nongnah, South West Khasi Hills District.
Kum ban shu pyntip hangne ba ïa ka Royal Brother’s SSA Lower Primary School la seng ha u snem 2000 ha kaba ki don 70 ngut ki khynnah pule naduh ka Class-Nursery haduh Class-IV ha kaba la ai jinghikai da ki 4 ngut ki nonghikai.
Hapdeng ki 25 snem ki jingïaid lynti, ki nongpynïaid ki la hap ban mad ïa kiba bun ki jingeh hynrei watla katta kane ka skul ka la lah ban sei bun ngut ki samla kiba mynta ki la long ki riewpawkhmat ha kiba bun ki liang ha ka imlang ka sahlang.
Ha kane ka sngi, u Bah Pius Marwein u la kular ban sa pynïoh jingïarap 10 lak na ka bynta ban pynkha shuh shuh ïa ki kamra klas bad ban maramot pynbha ïa kane ka skul.
