Shillong, Naitung, 15: Ka 19-South Shillong Advisory Committee ha ka Lah Sngi u Blei kaba la aiti ïa ka jingai jingmut sha ka Expert Committee ka la tyrwa ban bhah kyrpang 27 % na ka bynta ki longiing kiba kham duna ka khih ka kamai.
Ïa ka jingai jingmut la aiti da u Chairman jong ka Committee u Bah Sanbor Shullai uba long ruh u MLA jong ka South Shillong Constituency ha u Secretary ka Expert Committee u Bah L.K Diengdoh.
Ha ka jingïakren bad ki lad pathai khubor, u Bah Shullai ula ong, ka jingai jingmut ka long ban bhah mar 30% ïa ki Khasi, Jaiñtia bad Garo bad 27% na ka bynta ki longing kiba duna ka jingïoh kamai.
Nalor kata, ka SSAC ka la ai jingmut ruh ban mang kyrpang 87% na ka bynta ki longing ba duna ka jingïoh kamai kiba dei na ka jaidbynriew Khasi-Jaiñtia bad Garo, 6% ban mang na ka bynta ki longing ba duna ka jingïoh kamai kiba dei na kiwei ki jaidbynriew ST, SC bad OBC (na ka bynta kiwei ki ST-3% bad OBC bad SC-3%), 7% ban mang na ka bynta ki longing ba duna kamai kiba dei na ka Unreserved Category (UR), 6% ban kynthup lang na ka bynta kiwei pat ki jaidbynriew ST/SC bad OBC, na ka bynta kiwei pat ki ST – 3% , bad na ka bynta ki SC & OBC – 3% bad 7% na ka bynnta ki Unreserved Category.
Ka SSAC ka la ai jingmut ban mang kyrpang ruh 10% na ka bynta ki briew kiba don jingduna ha ki dkhotmet bad ïa ki briew kiba paw bha ïa ki jingïalehkai Sports, Arts bad Culture.
Na ka bynta ki District level posts ne Sub-divisional posts, ka SSAC ka la ai jingmut ban ym pynkynriah shabar jong ka District na ka jaka ba la shah thung bad ban mang kyrpang ruh da ka Combined Reservation kaba 87 percent ha ka jaka ban mang kyrpang la ka jong da kaba pynshong nongrim katkum ka khanasamari 2011.
Ka South Shillong Advisory Committee shuh shuh ka la ai jingmut ba la donkam ban khmih bniah biang ïa ka Reservation Policy kaba la wanrah katkum ka Resolution no: per.22/71/138 dated 12 January 1972.
Ka Advisory Committee ka la ai jingmut ba ïa ka Reservation Policy dei ban khmih bniah biang manla ka 10 snem.
