Nongstoiñ, K’lyngkot, 13: Ki jaka thep vote ha baroh 3 tylli ki Constituency jong ka West Khasi Hills District, na ka bynta ka election sha ka Khasi Hills Autonomous District Council ka ban sa long shen ki don baroh haduh 146 tylli bad na kine ki don kumba 29 tylli ki jaka thep vote ba ki bor synshar District ki la ithuh kum ki jaka ba lah ban shah ktah namar ki daw saiñ pyrhtei, na ka jingïakajia pud bad na ka jingjngai jong ki jaka thep vote.
Ïa kane la pyntip da u District Election Officer jong ka West Khasi Hills District ha ka Lah Sngi u Blei ha ka jingïalang ba la pynmih ïa ka Draft Electoral Roll na ka bynta ka elekshon KHADC 2025 ha baroh 3 tylli ki Constituency kiba kynthup ïa ka Nongstoiñ, ka Rambrai Jyrngam bad ka Mawshynrut bad katkum kane ka thup kyrteng jong ki nongthep vote ki don baroh 1,31,787 lak ngut, kata 45,961 hajar ngut ki nongthep vote ha Nongstoiñ, 42,058 hajar ngut ha Rambrai Jyrngam bad 43,768 hajar ngut ha Mawshynrut.
U District Election Officer (DEO) ha kane ka sngi u la aiti ruh ïa ka thup kyrteng jong ki nongthep vote sha ki nongmihkhmat jong ki seng sain pyrthei bapher bapher kiba la wan ha ka jingïalang kaba la long ha ka ophis treikam jong u Deputy Commisioner ha ryngkat ka jingïadonlang jong ki ophisar.
