Shillong, Risaw, 28: Ki Pulit ka Meghalaya ki la lap ksai ïa ka kynhun ki khaïi briew kaba shyrkhei bha kaba ju pynbiej ïa ki samla kynthei ban leit sha kiwei kiwei ki jylla na ka bynta ban ïathoh shongkurim, hynrei ki ngat pynban ha ka jingshah die.
Ki lai ngut ki briew, kynthup ïa ka Kingpin jong ka kynhun Gang, ki la shah kem ha ki Pulit halor kane ka jingjia.
Katkum ka jingpyntip jong u SSP ka Ri Bhoi u V. Rathore, ïa ka case la register ha u bnai Jylliew, 2025 hadien ba kawei ka samla kynthei ka la jahrngai ha ka thaiñ Byrnihat.
Ha ka jingtohkit, ki Pulit ki la lap ba kane ka samla ka don ha ka jylla Rajasthan bad ka la shah die bad shah pynïathoh bad uwei u briew uba kam ithuh ha ka dor T.3 lak.
Ïa kane ka samla kynthei la ïoh ban pyllait im da ka jingïarap jong ki Pulit ka Rajasthan ha kaba la wan ïalam biang ïa ka sha ka jylla Meghalaya.
Shuh shuh ka jingtohkit ka la lap ba kiba donkti, kata, u Rajesh Hinge, u Md. Khalil Ali bad ka Monika, ki dei kiba ju donkti ha ka kam khaïi briew.
Kine ki runar ki ju pynïadei paralok bad kino kino ki thei samla hapoh ka rynsan social media bad ki ju pynngop ïa ki ban leit kai shabar jylla bad hadien kata ki ju die kylla pat ïa ki. Kine ki lai ngut ki dei kiba la donkti ban die kumba 5 ngut ki samla kynthei na Assam bad iwei na ka jylla Tripura ha ki ar snem ba la leit noh.
Ki Pulit ki la kyrpad ïa ki kmie ki kpa bad ïa ki khynnah ba kin husiar bha ïa kum kine ki kynhun bad ban long kiba phikir bha haba ki ïakren bad kino kino ki briew ki bym ithuh ha ka rynsan social media.
“Ka jingtohkit ka pyni ba don ka rukom treikam ba ju donkti ha ka jingkhaïi briew, kata, da kaba ithuh shwa ïa kiba shah pynlong sohpdung bad ban pynïadei paralok ha ka rynsan social media kum Facebook, Instagram, bad kiwei kiwei bad hadien ba ki la ïakren bad ïa phone kumba katto katne por, ki shah pynngop ban leit sha kiwei pat ki jaka kum sha Delhi, Haryana, Rajasthan, bad kiwei kiwei da kaba pynshong kurim, ne kam jngohkai pyrthei bad hadien kata, ki shah die syndon,” la ong u SSP.
“Namarkata, ki khun ki kti jong ngi ki dei ban long kiba husiar bha bad ban pyntip sha ki kmie ki kpa lada jia kum kine ki jingjia. Ki dei ban long kiba husiar bad kiba phikir bha namarba ka kynhun gang ka lah ban leh wat ïa kiwei kiwei ki kam runar kum ka Cyber Fraud, UPI Fraud, Blackmailing bad kiwei kiwei. Kim dei ban thep ïa kino kino ki Application ki bym tip ne khñiot ïa kano kano ka Link ba suba sniew la ka long ha ki mobile phone jong ki bad ha ki Computer,” u la bynrap.
