Shillong, Jylliew 27: U Myntri Rangbah ka Jylla u Conrad K Sangma, ha ka sngi Palei ula pyllait paidbah ïa ka Chief Minister’s Research Grant (CMRG) ban pynshlur ïa ki jingwadbniah hapoh ka Jylla.
Ïa ka CMRG la pyllait ha ka jingïalang kaba long ha Secretariat ba la sakhi lang da u Myntri ka tnat Arts & Culture Bah Paul Lyngdoh bad ki ophisar ka Sorkar Jylla.
Ka jingthmu jong ka CMRG ka long ban pynshlur ïa ki jingwadbniah ba kynthup ïa ka Arts & Culture, ki jaitbynriew riewlum trai jylla, ka ktien ka thylliej, ka jinghiar pateng, ki jingtei sahnam u menbarim bad kiwei kiwei. Mana kawei pa kawei ka projek ki nongwad bniah kin ïoh ïa ka song pisa ba 3 lak ban pyndep hapoh 10 bnai.
Haba kren ha ka jingpyllait paidbah ïa ka CMRG, u Myntri Rangbah Conrad K Sangma ula ban jur ïa ka jingkongsan ki jingwad bniah bad jingbuh jingthoh. U la ong, “ngi don ka jingsngew ba ngi duna bha ka jingbuh jingthoh bad ka jingwadbniah. Ka jingwad bniah ba da leh thikna bad ka jingbuh jingthoh ki dei ki mawbyrsiew ïa kiba bun ki kam pynroi. Kane ka sienjam ka thmu ban kyrshan ïa ki scholar bad ki nongwad bniah kiba angnud ban synniang hynrei ki bym don ïa ki nongkyrshan”.
“Ngi ïohi ba kane ka jingwad bniah kan dei ka jingai pateng ïa ka jingnang jingtip ka ban ai jingmyntoi ïa ki pateng ki ban wan. Ka jingthmu jong ngi ka long ban nang pynheh ïa kane ka prokram katba nang ïaid ka por. Ngi kwah ban sdang da kaba rit, shemphang na ki bad sa nang pynheh,” ula ong.
