Shillong, Jymmang, 21: Ka Federation of Khasi Jaiñtia and Garo People (FKJGP) Khliehriat Circle ha ka sngi Balang ka la kyntu ïa u Superintendent of Police jong ka East Jaiñtia Hills District ba un shimkhia ïa ka jingjur shaba palat ka jingkhaii tuh ïa ki masi, shini bad kiwei kiwei ki kam runar ruser ha Umkiang, Huroi bad Borghat.
“La pyntip sha ngi lyngba ki paidbah ba ïa kine ki jaka la ju pynlong ki lynti ban khaii tuh ïa ki masi bad bad ka jingshalan be-aiñ ïa ka shini khlem ki kot ki sla ba biang sha ka ri Bangladesh,” ong ka seng ha ka dorkhas ba la soi da u President ka FKJGP Khliehriat Circle u Bah Michal Chyrmang bad u General Secretay u Bah Justme Sana.
“Katba ki jingkhaii tuh kiba ju jia ha khappud, ki shnar khaii tuh ki ju pyndonkam ïa ka surok Khliehriat sha Sonapur bad ka surok Ladrymbai sha Borghat kum ka lynti ïaid ban leh ïa ki kam be-aiñ. Namarkata, ka don ka jingsuba kaba jur ba ki riewshimet kiba donkti ha kane ka kam beain ki ju ïarap ïa ki mynder Bangladeshi ban jam sha u pud u sam jong ka ri India khlem ki kot ki sla kiba biang. Shuh shuh, la suba ba kane ka jingrung be-aiñ ka don jingïadei bad ki kam shoh briew, kam lute bad kiwei kiwei ki kam beaiñ hapoh ki thaiñ khappud kaba pynsheptieng bad buh ïa ka jingbym shngaiñ jong ki trai shnong,” la ong ka seng.
“Namarkata, ngi kyntu jur ïa phi ban shimkhia bha ïa kane ka kam da kaba shim ïa ki lad ki lynti ban khanglad ïa ki kam beaiñ da kaba ïatreilang bad ki shipai BSF khnang ban ithuh bad ban pyndkut ïa kane ka kam runar,” la bynrap ka Seng.
Ka seng ka ong ruh ba ka jingpynikam jong ka tnat Pulit kan ïada ïa ki kam runar ruser bad kan ïada ïa ka jingim bad ka jingmyntoi jong ki paidbah kiba im ha khappud bad nalor kata ka seng ka la ong ba ka kloi kaba kloi ban ïatreilang bad ka tnat Pulit.
“Ngi kyrpad ïa phi ban shim ïa ki lad ki lynti hapoh lai sngi hynrei lym kumta, ngi pyntip ruh ïa phi ba ngim don lad shuh da kumwei pat hynrei ban tuklar da ka seng ïa kane ka kam khnang ban ïada ïa ka khyndew ka shyiap bad ïa ki nongshong shnong jong ngi,” la bynrap ka dorkhas na ka Seng.
 | ReplyForwardAdd reaction |
