Shillong, Nailar, 03: Ka FMA-Outreach hadien ba ka ladep ban ai ïa ka jinghikai kaba shiphew sngi, ka la ai kyrshan ïa ki nongri jingri da kaba bei pisa T. 30,000 hajar ban shna ïa ki sem syiar bad nalor kaba aiti ruh ïa ki symbai syiar sha ki laiphew ngut ki nongri jingri ha ka shnong ka Madan Sai Siej, East Khasi Hills District.
Khnang ban ïarap ïa ki paidbah ba kin nang pynkhlain ïa ka kam jong ki ka la khot ïa ka PRIME ban ai jingkren ha kaba ka Asst Manager (Sector Head – Bussiness Fecilitation) ka Prime Hub Meghalaya ka Kong Streamlet Sohtun ka la ai jingbatai ïa ki dkhot jong ka Self Help Group kaba don ha ka shnong Madan Sai Siej.
Ka kynhun jong ka Prime ka la leit jngoh ruh ïa ka jaka ri jingri jong kane ka Self Help Group ïa kaba la shna lyngba ka Livelihood and Enterprise Development Programme bad ba la pyntrei da ki Sister ka FMA Outreach bad ba la bei pisa pat da ka NABARD ha ka jinglut kaba kot 30 hajar tyngka ba la lamkhmat da ka Sister Janicia Nongrum ryngkat ka jingsynran lang ka Kong Airisha Nongbri.
Ha kane ka sngi la batai ïa ki dkhot ka Self Help Group ïa ki jingdonkam ba kin ïoh jinghikai bad kumno ruh ba kin ïoh jingïarap na ka sorkar ba kin pynheh shuh shuh ïa ka kam jong ki.
