Shillong, Jymmang 17: U Myntri Rangbah ka jylla u Conrad K Sangma ha ka sngi Saitjaiñ u la leit ban jurip ïa ki jingtei ka Living Root Bridges Experience Centre kaba don ha ka shnong Wahlyngkhat kaba dang hab ha Pynursla sub-division kaba ha East Khasi Hills District.
Ka pisa ba la mang ban tei kan kot haduh T. 70 klur kaba kynthup ruh ïa ka jingshna ïa ka Living Root Bridges Experience Centre bad ïa ka Wahkhen Residential Music Retreat.
Kum shi bynta na kane ka project, la ong ba ki shnong kum ka Mawkyrnot, Rangthylliang bad Mynrieng kin sa shah pynïasoh lyngba ki lynti ïaid kjat bad kiwei pat ki projek jngohkai pyrthei.
U Myntri Rangbah u la ong ba la jied ïa kine ki jaka halor ka jingdon jong ki living root bridge kiba dei ruh kiba bun tam ha kane ka thaiñ Wahlyngkhat.
U la pyntip ruh ba ka Wahkhen residential music retreat kan ai lad ïa kiba wan jngohkai ba kin tip ïa ka jingriewspah ha ka put ka tem jong ki Khasi.
“Ka living root bridge experience centre kan sa urlong ha Wahlyngkhat. Ka daw ba balei ngi la jied ïa kane ka jaka ka dei namar ka jingdon jong ki jingkieng jri ne ki living root bridge, bad lyngba kane ka centre, ki nongwan jngohkai kin lah ban sngewthuh ïa ki riti dustur, ki khana, ki jingstad bad kiwei kiwei ki kam kiba kyrpang kaba kane ka thaiñ bad ka jylla ka don,” ong u Sangma.
Ha kawei pat ka liang ka jingleit jngoh jong u ïa ka khlaw kyntang kaba don ha Raid Nongblai area, u Myntri Rangbah ula ong, “Kane kadei ka khlaw kaba rben bha kaba nga la ïohi bad kadei ka jingshem kaba kyrpang bad donkam ban kyntiew ïa kane ka jaka na ka bynta ban khring ïa ki nongwan jngohkai ha kane ka jaka.”
“Kumba nga la ong mynshwa ban buh ïa ka experience centre na ka bynta ki living root bridge, ka long kaba shonghok ba kane ka khlaw kyntang bad kane ka thaiñ hi baroh kawei la donkam ban kyntiew khamtam ha kaba ïadei bad ki kam jngohkai pyrthei,” u la bynrap.
