Shillong, Naiwieng 07: Ka Hynñiewtrep Youths Council (HYC) ha ka sngi Palei ka la aipor 30 sngi ïa ka Sorkar Meghalaya Democratic Alliance (MDA) ba la ïalam da ka National Peoples Party (NPP) ba kan pyntreikam noh mardor ïa ki mat jingdawa ba ka Seng ka la phah u Myntri Rangbah ka Jylla u Conrad K Sangma.
Ka seng ka la byrngem ruh ban tur sha Secretariat lada ka Sorkar ka pynkheiñ ïa ki jubanlak ban pyntreikam ïa ki 7 tylli ki mat jingdawa kiba ka seng ka la kdew.
Ha ka jingïalang kaba la long ha Motphran, u President jong ka HYC u Bah Roykupar Synrem u la pule paidbah ïa ka shithi ba la ïohpdiang na u Myntri ka tnad Social Welfare u Bah Paul Lyngdoh uba long ruh u Nongaiktien jong ka Sorkar Jylla da kaba pyntip ba ka Sorkar kan pynkhlaiñ ïa ka Anti Narcotic Task Force (ANTF) da kaba pynïakhladnoh na ka District Executive Force jong ki District ha kaba ïadei bad ka jingïakhun thma pyrshah ïa u drok.
Ka Sorkar ka la ai jubab ruh ban buh ïa ki Fast Track Court ne ki Iingkashakri ba kyrpang bad ban wanrah shuh shuh ïa ki aiñ kiba khlaiñ ban ïakhun pyrshah ïa ka jingjyllei jong u drok ha ka Jylla.
U Bah Synrem ula ïathuh ruh lyngba ka shithi ka Sorkar ka la pyntip ba ha ka 14 tarik mynt u bnai yn sa shong ïa ka jingïalang ba nyngkong jong ka State Level Meeting ban sa pynïaid da u Symbud Myntri Rangbah ka jylla uba khmih ïa ka tnad Kam Pohiing u Bah Prestone Tynsong bad u Mission Director ba dang shu thung shen u Bah Francis G. Kharshiing ban ïathir ïatai halor ki sienjam Drug Reduction Elimination and Action Mission (DREAM) ba la pynbna hi da ka Sorkar Jylla ha u snem 2022.
Ka HYC ka la ai por ruh ïa ka Sorkar Jylla ba hapoh 30 naduh mynta ka sngi ba ka seng ka la ïohpdiang ïa ka shithi, ka Sorkar ka dei ban pyntikna ba ka ANTF ka ladei ban pyntreikam bad ban buh ïa ki Iingkashari ba kyrpang bad ban thung ïa ki Nongïasaid aiñ Sorkar kiba kyrpang.
“Hynrei lada ka Sorkar kam lah ban pyntikna ïa kine hapoh ka 30 sngi, ka seng kan leit tur paidbah sha Secretariat ,” la pynbna u President ka HYC ha ka jingïalang.
