Shillong, Nailur 26: Ka election ban jied ïa u Chief Executive Member (CEM) jong ka Khasi Hills Autonomous District Council (KHADC) kan long ha ka 30 tarik mynta u bnai.
Ïa kane ka pyntip da u Secretary jong ka KHADC ha ka sngi Thohdieng.
Ka jingpynlong ïa kane ka election ka la long kaba kongsan hadien jong ka jingkhyllem noh ka EC barim kaba dang ïaid treikam tang kumba 7 bnai bad ka daw ka long na ka jinghiar shuki jong u MDC ka VPP na Langkyrdem-Laitkroh u Bah Shemborlang Rynjah na ka shuki chief executive member (CEM).
U MDC ka Nongthymmai u Bah Winston Tony Lyngdoh uba la long lypa u kyrtong ka VPP na ka bynta ka shuki CEM un sa shahjied beit khlem don kiba ïaleh pyrshah kum u CEM ba thymmai ka KHADC.
Ïa u Bah Winston la jied kum u kyrtong CEM ha ka jingïalang jong ka VPP ba la pynïaid da u President u Bah Ardent Basaiawmoit bad ba la shim bynta da baroh ki MDC ka party.
Na ka liang ka party ka la pynbna ruh ïa u MDC ka Jaïaw u Bah Denzil Raynard Chen ban long kum u Executive Member ba thymmai.
Ha ka shithi ba la aiti sha u Chairman ka KHADC u Bah Strong Pillar Kharjana, u Bah Rynjah u la ong ba ka daw jong ka jinghiar noh jong u na ka shuki CEM ka dei namarba um don ha ka met kaba shait kaba khlaiñ.
