Shillong, Lber, 24: Ki dkhot jong ka Media Committee jong ka Episcopal Ordination ki la pyntip ba ha ka 30 tarik mynta u bnai yn sa pynkyntang Bishop ïa u Phadar Bernard Laloo hadien ba u Pope Francis u la thung ïa u ha ka 8 tarik, Rymphang 2025 kum u Auxiliary Bishop jong ka jylla Niambah Shillong.
Haba kren sha ki lad pathai khubor ha Shillong Press Club u Bedarios Shylla uba dei u dkhot jong ka Episcopal Media Communities u la ïathuh ba u Fr. Bernard u dei u khun khatduh na ki khatwei ngut ki khun jong u Bah Pius Prel Shabong (bam kwai ha dwar u Blei) bad ka Kong Aquila Imai Laloo. La kha ïa u Fr. Bernard ha ka 16 tarik, Jylliew, 1976 ha ka shnong Laitlyngkot, East Khasi Hills District.
U la pyndep ïa ka kyrdan pule BA (Honours) Political Science ha u snem 1999, ïa ka Bachelor of Education ha u snem 2007, ïa ka Master of Arts ha ka sobjek Sociology ha u snem 2009, ïa ka Post Graduate Diploma in Councelling ha u snem 2016. U dei ruh u nongthaw jingrwai niam uba tbit, u nonhthoh kot bad ula pynmih ruh katto katne tylli ki phlim Khasi ba la tip kum ka ‘Synshar Ka Jot’ bad ‘Hato shano kan ïalam.”
La pynkyntang Lyngdoh Sohblei ïa u Fr. Bernard Laloo ha ka 30 tarik, Ïaiong, 2006 ha Parish Laitlyngkot. Hadien ka jingpynkyntang Lyngdoh Sohblei u la trei kum u Lyngdoh synrop ha St.Paul’s Parish, Upper Shillong ha u snem 2006 bad 2007. U la long kum u Administrator ha Christ King College ha u snem 2008, kum u Prefect of Studies ha St.Paul’s Apostolic School, Upper Shillong ha u snem 2009 haduh 2015, kum u Principal jong ka Divine Savior Higher Secondary School , Laitumkhrah ha u snem 2016, kum u Director jong ka Social Service Center (SSC) Shillong naduh u snem 2017 haduh 2021, kum u Board Member jong ka Caritas India naduh u snem 2021 haduh 2024, kum u Parish Priest jong ka Cathedral Parish, Laitumkhrah naduh u snem 2022 haduh mynta bad u dei ruh u Chancellor jong ka Jyllaniambah Shillong.
Ha ka jingpynkyntang Bishop ïa u Fr. Bernard ha madan Calvary Cathedral bad yn sdang da ka Mass Bakhuid ha ka por 10:00 baje mynstep bad ha kane ka sngi yn sa sakhi lang ruh da u Apostolic Nuncio ne u nongmihkhmat jong u Pope Francis sha India bad sha Nepal u Most Rev. Leopoldo Girelli nalor ki Bishop jong ka thaiñ Shatei Lammihngi ka ri India na ki 15 tylli ki Jyllaniam ryngkat, ki Lyngdoh bad ki riewniam.
