Shillong, ïaïong, 01: Ka Confederation of Ri Bhoi People ha ka sngi Baar ka la mih shakhmat ban pyrshah jur ïa ka jingthied jaka da ka Meghalaya Industrial Development Corporation ha ka shnong Umsiang, Ribhoi District kaba don ha khappud jong ka jylla Meghalaya bad ka jylla Assam.
Ha ka jingïakren bad ki lad pathai khubor u Working President jong ka seng u Bah Pateng Myrsing u la ong ba ka seng ka pyrshah jur ïa kane ka jingthied jong ka MIDC ïa ka jaka kaba la kot 300 Akar ha ka dor kaba 100 klur tyngka.
U Bah Myrsing u la ong ba ka jingpyrshah jong ka seng ka long hadien ba la ïoh jingtip ba ïa kane ka jingthied jaka da ka MIDC la shu ai sopsop ïa ka No Objection Certificate tang da ki Rangbah Shnong bad u Syiem khlem ka jingpyntip ïa ki paidbah nongshong shnong.
U la ong ba ka seng kan ym ailad ïa kine ki kam leh sopsop kumba la paw hadien ka jingthmu pynkylla ïa ka Soil and Water Conservation Byrnihat sha ka jaka ban buh ïa ki Karkhana hadien ba ka la mih ka jingpyrshah kaba jur na ki paidbah jong ka thain Byrnihat.
