Shillong, Nailur, 12: Ka Sorkar Meghalaya ka la tyrwa ïa ka Supplementary Demand kaba kot T. 333 klur ban bei ïa ki projek pynroi sor bapher bapher, kynthup ïa ka jingtei ïa ka Secretariat ba thymmai, ka Additional Secretariat Complex bad ïa ki Working Women Hostel.
Na kane, T.200 klur la pan lyngba ka Supplementary Demand na kabynta u snem mang tyngka ba mynta ha kaba ïadei bad ka Secretariat Bathymmai ha New Shillong, kaba ka jinglut jong ka projek kan kot T.1231.03 klur. Kane ka Secretariat kaba thymmai kan kynthup ïa ki ophis Sorkar, kan pynbha ïa ka jingïatreilang bad ka jingtreikam, ong u Symbud Myntri Rangbah uba khmih ïa ka tnat Pynroi Sor u Bah Sniawbhalang Dhar haba jubab halor ka Cut Motion ba la wanrah da u Nongïalam ka Liang Pyrshah u Dr. Mukul Sangma bad ka MLA jong ka TMC na Ampati ka Miani D. Shira ha ka ïingdorbar thawaiñ ha ka sngi Thohdieng.
U la pyntip ba T. 45 klur la pan lyngba ka Supplementary Demand ban shna ïa ka Additional Secretariat Complex ha Tura, ka projek kaba kot T. 165.80 klur.
Ka Complex kan don ïa ki kamra treikam jong ki nongmihkhmat, ki ophisar, ki nongtrei, ban pynjanai ïa ka synshar ka khadar.
U Symbud Myntri Rangbah u la pyntip ba ka Sorkar ka la tyrwa ruh ban shna ïa ka Hostel ba 400 kamra ha Shillong bad 200 kamra ha Jowai bad Tura (ha ka jinglut kaba kot T. 144.80 klur) ban kyntiew ïa ka jingïashim bynta jong ki kynthei ha ki kam bad ban pynbiang ïa ki jaka sah kiba shngaiñ bad na ka bynta kane, ka jingdawa pisa kaba mynta ka long T. 88.000 klur ïa kaba la pan lyngba ka Supplementary Demand na ka bynta une u snem mang tyngka.
