Shillong, Lber, 26: Ka Dorbar Mang Tyngka jong ka Khasi Hills Autonomous District Council (KHADC) ka la sdang ha ka sngi Balang.
Ha kane ka Dorbar, u Executive Member ba khmih ïa ka tnat Pla Tyngka u Bah Seiborlang Warbah u la wanrah ïa ka Mang Tyngka kaba ka Council kan pynlut T. 35,40,50,600 klur na ka bynta ka lai bnai kata naduh ka 1 tarik, Ïaiong 2025 haduh ka 30 tarik, Jylliew 2025 katba ïa ka Mang Tyngka ba pura jong u snem 2025-2026 ka Council kan sa wanrah ha ka Dorbar ka ban sa wan.
Ha ka jingkren jong u halor ka Mang Tyngka u Bah Seiborlang u la ong ba ka Council kam pat lah ban wanrah ïa ka Mang Tyngka kaba pura namar ka jingthmit palat ka por hynrei ïa mynta ka jingpynkhreh ïa ka mang tyngka ka long beit thik kumba lai bnai.
Namarba ka dei ka mang tyngka kaba tang lai bnai, ha kane ka mang tyngka kaba mynta la paw tang ki jingpynlut kiba ka Council ka hap ban pynlut kaba kynthup ïa ka jingsiew tulop ïa ki nongtrei bad kiwei pat katba ka jingmih pat kam shym la paw eiei.
