Shillong, Lber, 12: U Myntri ka Sorkar Jylla uba khmih ïa ka tnat Pule Puthi u Rakkam A Sangma ha ka sngi Balang u la ïathuh ba 38 tylli ki Eklavya Model Residential Schools (EMRS) la mang pisa ban shna ha baroh kawei ka jylla.
“Ngi la tyrwa ruh ban shna saw tylli ki Center of Excellence for Sports bad ngi dang ap ïa ka jingmynjur na ka Sorkar Pdeng,” ong u Rakkam haba ai jubab ha ki kynta kylli jingkylli.
U la pyntip ba san tylli na ki 38 tylli ki EMRS ki ïakynduh mawsiang ban ïoh jaka bad kine ki long ka Laitkor block, Mawryngkneng Block, Mylliem Block, Umsning Block bad ka Laskeiñ Block.
Katkum ka jingong jong u, 16 tylli ki projek ki dei kiba ïaid shakhmat katba 7 tylli ki dei kiba dang pynkhreh ïa ka Detailed Project Report (DPR).
Shuh shuh, u Myntri u la pyntip ba haduh mynta ka jingshna ïa ki ar tylli ki skul EMRS ha Samanda bad ha Pahamsyiem la pyndep nadong shadong.
“Ngi la ïakren bad ka Ministry ban pyntreikam noh ïa ki (kham kloi),” u la ong.
Haba u MLA ka Mawryngkneng Bah Heavingstone Kharpran u la kyntait ba ka don ka jingbym ai jaka ha Mawryngkneng watla ka dorbar shnong ka la ai ïa ka NOC bad ki ophisar ka tnat Pule Puthi ruh ki ladep ban sorjamin, u Myntri u la ong ba ka tnat ka dang ap ïa ka kaiphod kaba khatduh halor kane ka kam.
