Shillong, Lber 06 : Ka sorkar ka la thied palat 500 ton u synsar da kaba pynlut haduh 4.76 klur tyngka kum shi bynta ban kyrshan bad ïarap ïa ki spah spah ngut ki nongrep ha ka por ba ka dor jong u synsar ka hiar.
Ïa kane la pyntip da ka Myntri ba peit ïa ka tnad Kam Rep ka sorkar jylla, Dr. M Ampareen Lyngdoh haba jubab halor ka jingkylli ha ka Dorbar Mangtyngka ha kane ka sngi Palei.
Katkum ka jingïathuh jong u, kane ka sienjam ba shim da ka sorkar ka dei lyngba ka CM Assure kaba dei ka jingkyrshan jong ka sorkar haba ïadei bad ki mar rep bym pyut haba ka dor jong ki la la hiar shaba palat na ka dor ïew. La ong ruh ba ka dor ba la thied ïa kitei ki mar rep ka long kum ka bai luksan na bynta ka bor trei jong ki nongrep bad ruh ba kin ïoh nong katto katne.
Ka Myntri ka la ïathuh ba dei ha u 2024 ba ka sorkar kala shim ïa katei ka sienjam ban ïarap ïa ki nongrep synsar kiba la poi ha ka kut lad haba ka dor jong u ka hiar. Kumta hapoh kane ka skim, ka Meghalaya State Agriculture Marketing Board (MSAMB) ka thied ïa u synsar na ki nongrep lyngba ki nongthied ba la buh ha ka dor kaba tam na ka dor ha iew.
“La thied palat 500 ton u synshar ha ka dor kaba 4.76 klur tyngka kaba la long pat ka sienjam ban ïarap ïa ki spah spah ngut ki nongrep synsar,” la bynrap biang ka Myntri.
Shuh shuh ka ong ruh ba ka sorkar hadien baka ïohi ba kane ka ïarap ïa ki nongrep, kumta ka la rai ban bteng ïa kane ka sienjam ban ïarap ïa ki nongrep haba ki donkam.
Na ka liang u Myntri Rangbah Conrad K Sangma haba jubab halor ka jingkylli ba buh da u MLA ka Amlarem Bah Lahkmen Rymbui, u la pyntip ba kane ka sienjam ba ki shim kadei namar kadei ka bynta kaba u sngewtynnad bha bad kaba ïarap ruh ïa ki nongrep ha ka por ba ki kynduh ha ka khim khait.
Halor ka jingkylli ba wanrah da u MLA ka Mylliem, Bah Ronnie V Lyngdoh la ka sorkar ka don jingthmu neem ban plie lad lem ka jingkyrshan ïa kiwei pat kiba rep kum u phan bad kiwei kiwei, u Myntri Rangbah u la pynshai ba kane ka sienjam ka long beit tang na bynta ki mar rep ki bym put kum u synsar bad ruh u kwai.
Tangba u pyntip pat ba na bynta ki mar rep kiba pyut, u Myntri Rangbah ula ong ba ka sorkar ka kular ban pynieng bun ki cold storage bad ki processing unit.
Ha kine ki 7 snem ki la mih bun bha ki cold storage bad bun kin sa nang mih.
