Shilllong, Jymmang, 16: Ka jingther jong u lapbah lapsan kumba theh na ktang uba la neh haduh saw kynta ha ka sngi Palei u la pynshlei ia ka Wah Umkhrah bad ka Wah Umshyrpi kiba dei ki ar tylli ki wah bakongsan kiba tuid lyngba ka dohnud jong ka sor Shillong ban pyndap ia ka pung Umiam kaba ju bsa ia ka bording sha ki phew lak tylli ki longïing ha kane ka jylla Meghalaya.
U slap u la hap ha ka por 12.24 baje noh sngi khlem sangeh tad haduh ka por 4:54 baje janmiet.
Ka jingther jong u lapbah lapsan ka la pynshlei um ha kylleng ki shnong jong ka sor Shillong.
Ka jingshlei jong ka Wah Umkhrah ka la pynkylla pung ia ka surok ha Mawlai Nongpdeng ha lyndet ka Seng Khasi College kaba pyniasoh ia ka surokbah National Highway, kat haduh ba ki kali kim lait shuh ban iaid namarba ka um ka la tap kumba 3 phut tam eiei ia ka surok.
La sakhi ba ki kali kiba wan na ka surokbah National Highway kim lah shuh ban rung sha ka surok shnong jong ka Mawlai Nongpdeng na ka daw ba ka um ka la khang lynti syndon sbak ia ka surok.
Watla ka um ka la kiew bha ha Wah Umkhrah, hynrei la iohi pat ba ki ing shong briew kiba don ha shilynter jong ka rud wah kim shym la shah ktah satia na kane ka jingshlei jong kane ka wah.
Ha Demseiñiong ka jingshlei jong ka Wah Umshyrpi ka la pynslei ia ka surok ha kaba ka la wanrah ia ka jingthud ha ka leit ka wan.
Ha surok Lower Lachaumiere mar pyrshah bad ka ophis DIPR ka la shlei hapdeng surok kat haduh ba la pynthud ia ka leit ka wan jong ki kali saw shaka bad ki thuk thuk ar shaka.
La sakhi ruh ba ki khynnah skul bad ki paidbah kim banse ban iaid napdeng ka um kaba la lang hapdeng surok hapdeng ka jingther jong u lapbah lapsan uba jur ban leit sha ki jaka ba ki thmu.
Kane ka jingther jong u lapbah ka la pynkulmar hi thlim ia ki Pulit pyniaid kali kiba la pyrshang bad trei shitom ban pyllait ia ka jingdheng kali kaba jur ha kane ka sngi namar ka jingsahkut jong ki kali.
Haba wad ia ka daw, la iathuh ba ka jingshlei um ha kane ka bynta jong ka surok ha Lower Lachaumiere ka dei na ka jingsahkut jong ki jaboh jabaiñ ha ka nala rit ba ka um ka dei ban tuid sha ka nala heh kaba don markhap bad kawei ka dukan die sha.
Nalor kata, la sakhi ruh ba ka surok Smart City ba la shu ieh khongreng ha lyndet jong ka ophis DIPR bad nakhmat ka Shillong Press Club ka la shlei da ka um bad uwei u rangbah briew uba iaid lynti u la mynsaw na ki bynta ka khohsiew hadien ba u la ur hapoh ka thliew na ka jingbym poi pyrkhat katba u dang iaid lynti.
Ha Them Iewmawlong, ka jingshlei jong ka um ka la pynkulmar thlim ia ki nongiaid lynti, ia ki nongthied nongpet, ia ki nongñiah kali bad ia ki nongkitnong.
Ka jingshlei jong ka um hapdeng surok kaba la rung ruh wat sha ki dukan kiba don hakhmat surok ka dei hi na ka daw ka jingleh sih shaba palat jong ki nongshong dukan kiba bret pathar ia ki jaboh jabain ha nala.
U nonglum khubor uba la ioh ban shondur ia kane ka jingshlei um ha Them Iewmawlong u la lap ba ki jaboh ki jabaiñ bad ki plastik kiba la satah baroh shikatta ha surok ki la per halor ka um kaba la pynshlei ia ka surok baroh kawei da ka um kaba la pynsuhsat pat ia ki paidbah ha ka leit ka wan bad ka rah ka rong.
Katkum ka jingtip ba la iohlum, la iathuh ruh ba ha kane ka jingther jong u lapbah lapsan ka kynroh jong ka Bormanik College ha Laimer, Upper Shillong, ka la twa kynsan ha ka por 3:30 baje eiei noh phai sngi.
Na ka jingtwa jong ka kynroh, ka khyndew bad u nar post ba la pyndait ia ki cable wire ki la hap hapdeng surok bad khang syndon sbak ia ka surok ha Pyrda Nongskeh, Upper Shillong.
La ioh jingtip ruh ba ka jingther jong u lapbah lapsan ha kane ka sngi ka la pynshlei um ia ka phyllaw jong ka Hubert Memorial Higher Secondary School, Umpling, Shillong ha kaba ka um ka la khang lynti syndon sbak ia ki khynnah skul kiba la sahkut hapoh skul khlem lait satia ban leit phai sha iing.
Katkum ki dur ba la shon da ki paidbah ba la phah sha u nonglum khubor la sakhi ba ka phyllaw jong kane ka skul ka la shlei lut da ka um kaba la kylla kum ka pung.
Ka jingbteng jong u slap ban ther khamtam ha ki kynta ba la wai skul ka la wanrah ia ka jingdheng kali kaba jur bad bun ki khynnah skul ki la sahkut ha skul tad haduh ka por janmiet 4 baje tam eiei.
