Shillong, Naitung 19: Ka Sorkar Jylla ha ka sngi Thohdieng ka la rai ban kyntiew ïa ka tulop jong ki Nongtrei 108 Emergency Services da 4 %.
Haba iathuh halor kane, ka Myntri ka Koit ka Khiah ka Kong Ampareen Lyngdoh ka la ong, “Ngi la mynjur ban ïasoi biang ïa kito ki contract bad ki nongtrei 108 bad hadien ka jingïasyllok, la mynjur ban kyntiew 4% ka tulop namar kine ki dei kiba sahteng hapoh ka National Health Mission (NHM) jong ka Tnat ka Koit ka khiah”.
Ka la ong ruh ba kine ki nongtrei haba sdang ka jingïasoi soskular bad ka NHM, kaba dei ka jingpynbeit ba shipor jong ka Sorkar ban pynïaid ïa ka 108 Emergency ha Jylla, kila don shibun ki jingïasyllok bad jingïakren bad ki nongtrei 108.
“Namar kila ïasoi ïa ka soskular ba shisnem bad ka NHM, kine ki soskular ki dei ïa kaba hap ban pyn thymmai. Ka dei ka contract ba shi snem kumta ngi hap ban pynthymmai biang ïa baroh kine ki contract ba ki nongtrei kiba trei ïa ki kam bapher bapher,” ka la bynrap.
Shuh shuh ka Myntri ka la pyntip ba ka tnat ka la ïakren ruh bad ki tnat bapher bapher ban ïa ai jingmut lang halor ka kam ba ïadei bad ka jingpyllait tender biang na ka bynta ban pynïaid ïa ka 108 Emergency Service hapoh ka Jylla.
Ka Myntri ka pyntip ba ka la ïoh pdiang ruh sa ïa kawei ka jingthoh ba ki don sa kawei ka kynhun ki nongtrei ka 108 ki bym pat hun ïa ka jingpynkiew tulop ba 4% halor ki nongrim bapher bapher.
“Kam don jingmut ban ïakren ïa kane hynrei khamtam ïa lai jait ki nongtrei-pilot, receptionist bad ERO-kine ki nongtrei kila ïasoi ïa ka soskular bad ka NHM ba shisnem, kila sdang da ka tulop kaba rit bha bad kane ka dei kaba hap ban pynbeit. Ngam tip la ngin lah ne em ban leh ïa kata hynrei nga la ïoh pdiang ïa ka jingthoh ha ka 18 tarik Naitung, ngan sa pule ïa ka,” ka la ong.
