Shillong, Jymmang, 17: Ka Iingbishar Meghalaya High Court ha ka sngi Palei mynta ka taiew ka la bthah ïa ka Sorkar Jylla ban thaw da ka komiti ban weng ïa ka jingjyllei jong ki ksew surok ha ka jylla baroh kawei.
Ka Bench kaba kynthup ïa u Chief Justice IP Mukerji bad u Justice W Diengdoh ha ka hukum ba ki la pynmih hadien ba la shong bishar ïa ka PIL ki la ong, “ka Sorkar Jylla ka dei ban shimkhia mardor ym palat ïa ka saw bnai naduh ka sngi ba la thaw ïa ka Committee ha kaba ïadei bad ka rule 4 jong ka Rule. Hadien kata, ka Committee kan treikam noh mardor katkum ka rule 5.”
Kane ka la wan hadien ba u Kaustav Paul, u nongujor ba la mihkhmat da lade u la kdew ïa ki sienjam ba la shim da ka Ingbishar kin ym long kiba biang. U la pynpaw ar tylli ki daw halor kane. Kaba nyngkong, ba kane ka hukum kan treikam tang ha Shillong. Ka jingjyllei jong ki ksew surok ka long ha baroh kawei ka jylla Meghalaya. Kaba ar, u la pynpaw ha ngi ba ka Animal Birth Control (Dogs) Rules, 2001 ba la pynjari hapoh ka sub section (1) jong ka section 38 hapoh ka Prevention of Cruelty to Animals Act, 1960. Ki kyndon ki la sah tang ha ka kot sada bad ym shym la pyntreikam.
U Paul u la kdew ruh ba ka Section 4 la ailad ban thaw ïa ka Comittee kaba kynthup ïa u Commissioner/Khlieh jong ka bor synshar shnong, u ban long u Chairman, ki nongmihkhmat jong ka Public Health Animal Welfare, ka District Society na ka bynta ka Aiñ ba la kdew, ka Animal Welfare Organisations bad ‘nongïarap ne u riewshimet ba pawkhmat.” U la pynpaw ba ïa kane ka Committee dei ban thaw noh mardor bad pyndep ïa ki kam jong ka kumba la kdew ha ka rule 5.
“Kine ki kam ki kynthup ïa ki lad ki lynti kiba ngi la bthah ban shim ha kaba ïadei bad ka jingjyllei ki ksew surok. Ka hukum jong ngi, u ong u ong, ka dei ban treikam ha ka jylla baroh kawei. Ha kum kita ki khep, ngi peit bad bthah ba ka jingïar ka jingtreikam jong kane ka hukum ka dei ban treikam kylleng ka Jylla Meghalaya,” ong ka Bench.
Ka Bench ka la bthah ba ki Commissioner jong ki district bad District Council ki dei ban ïoh ïa ka kopi jong ka writ petition ryngkat bad ki hukum ba la pynmih da u Advocate-on-Record na ka bynta ka jylla hapoh shi taiew naduh mynta.
“Ki Commissioner ryngkat bad ka District Council lem bad ki bor Municipal ki dei ban pyntreikam ïa ka hukum jong ngi ha ki District,” la ong ka hukum haba bthah ruh ïa ka jylla ban ai ïa ka jubab kaba bniah ha kaba ïadei bad ka kam ba la leh shwa ka tarik shwa ban shong bishar biang ha ka 16 tarik, Naitung..
Dang shen, ka Sorkar Jylla ka la pynjlan ban sumar ïa ki ksew surok ha ki jaka sah tang na ka bynta khyndiat por namarba ka Shillong Municipal Board (SMB) kam don satia ïa ka jaka ri kaba paka ban sumar ïa ki.
Ka SMB ka la pyntip ba ka la pyntip ba ka dang ïaid shakhmat ban ïoh jaka na ka bynta ban tei sa kawei pat ka jaka ri ksew bapuara bad hadien kata yn sa pynkynriah noh ïa ki mrad ha ka jaka ri ksew jong ka Municipal Board.
