Shillong, Nailar, 13: U Myntri Rangbah ka jylla u Conrad K Sangma u la pynbna ba ka Sorkar Jylla kan bei pisa palat 40 haduh 45 klur tyngka na ka bynta ban pynbha ïa ki jingtei bad ban pynitynnad ïa ka Ïewduh, ka kad khaii kaba heh bad kaba la rim tam ha ka jylla Meghalaya.
Haba kren ha ka jingbuh mawnongrim na ka bynta ka bynta ka wat kaba ar jong ka projek ba la mynjur da ka North Eastern Council (NEC) ha ka jinglut kaba T.14 klur, u Sangma u la ong, “nga ai khublei ïa u Myntri ka tnat DoNER na ka bynta ka jingsbun mynsiem jong u. Hadien ba ngi la pynsngew ha u shaphang ka jingdonkam jong ka Ïewduh, da ka jingkmen kaba khraw u la mynjur ban mang ïa ka pisa bad mynta ka sngi ngi la buh ïa u maw nongrim na ka bynta ka bynta ka wat ar jong ka projek ban pynitynnad ïa ka Ïewduh.”
“Ngi ladep sdang ïa ka wat ba nyngkong kaba kot T. 5 klur bad phi la ïohi mynta ka sngi ba ngi dang dep ban jurip bad ngi bishar bniah ïa ki kam kiba ladep,” u la ong.
U Myntri Rangbah u la pynbna ruh ba mynta yn dang pynkhreh pat sa ïa ka Detailed Project Report (DPR) na ka bynta ka wat kaba lai, kaba la khmihlynti ba ka jinglut kan kot kumba 20 klur tyngka.
“Kane ka mut ha ka jingkheiñ kyllum kan kot 40 – 45 klur tyngka ban sa pynlut na ka bynta pynbha ïa ki jingtei baroh bad ban pynitynnad ïa ka Ïewduh,” u la ong da kaba kyrpad ruh ïa baroh 5500 ngut ki nongdie dukan bad ki nongdie madan kiba la pynrung kyrteng bad ka Hima Mylliem ban pynneh pynsah ïa ka jingkhuid jingsuba jong ka Ïewduh.
“Lada baroh ngi ïatylli bad leh ïa la ka jong ka bynta, nga ngeit skhem ba ka Ïewduh kan sa long kawei na ki ïew ba itynnad tam ym tang ha Shillong hynrei ha baroh kawei ka thaiñ Shatei Lammihngi bad ka Ri India baroh kawei. Kata, ka dei shisha ka thong jong ngi bad nga pan ïa ka jingïatreilang jong phi khnang ba ngin lah ban pynurlong ïa kata ka thong,” la bynrap shuh shuh u Sangma.
U Sangma u la pynpaw ïa ka jingsngewkhia halor ka jingsahdien ka Ïewduh bad u la ong ba wat hapdeng ka jingkiew ka ïoh ka kot jong ka jylla baroh kawei, hynrei ka Ïewduh ka la sahdien haduh katta katta khlem jingkylla mynta la jan 35 snem.
U la ban jur ba ka roi ka par jong ka jylla kam long kaba pura khlem ka jingkiew jong ki nongdie madan, ki nongdie dukan, ki nongrep bad ki nongseng kam seng jam kiba im kamai jakpoh manla ka sngi.
Ha kaba ïadei bad ka jingleit jurip jong u ïa ka Ïewduh ha u bnai Jymmang mynta u snem, u Sangma u la ban jur ba ïa ki rai kiba ktah ïa ka jingim jong ki briew ym lah ban shim tang na ka miej ophis hynrei ka donkam ïa ka jingsngewthuh kaba na tynrai shaphang ki jingeh bad ka jingtynjuh ba ki mad.
