Shillong, Jymmang, 14: Ki Pulit ka Uttar Pradesh ki la register case haduh 40 tylli ki ejahar pyrshah ïa ki Social Media Account bad ki la kem ruh 25 ngut ki briew kiba donkti ban kynthoh pyrshah ïa ka ri India lyngba ki rynsan Social Media halor ka Operation Sindoor.
Haba pyntreikam ïa ka hukum jong u Myntri Rangbah ka Jylla u Yogi Adiyanath, u Director General of Police u Prashant Kumar u la hukum ïa ki ophisar Pulit ba ki dei ban thwet tyngeh ïa ki briew namarba ka jingkynthoh pyrshah ri jong ki ka long pyrshah ïa ka aiñ.
Hadien ba la mih ka hukum na u Myntri Rangbah, ki Pulit khlem pynslem ki la thwet tyngeh ban lap ïa ki jaka sah jong ki briew kiba kren pyrshah ïa ka ri tad haduh mynta ki la ïoh kem 25 ngut.
Ki Pulit ki la maham ïa ki paidbah ba ki dei ban da pyrkhat bha ar sien ym ban kren shongshit shuwa ba kin kynthoh ïa kino kino ki jingthoh shongshit ha ka rynsan Social Media namarba ïoh ka ktah ïa ka Ri bad kin ngat ei ha ka jingshah pynshitom.
Ki la kyntu ba ki dei ban da pyntikna shuwa ba kin thep ïa ki dur ne ki Video ha Social Media lyngba ka Fact Check jong ki Pulit kaba don ha X Account jong ki.
