Shillong, Nailar, 01: Ka Trinamool Congress (TMC) ka la byrngem ba ki MLA bad ki MDC jong ka kin ïasnohkti lang ha ka jingïakhih jong ki nongtrei ka Garo Hills Autonomous District Council (GHADC) lada ka Sorkar kam lah ban weng ïa ka jingeh na ka jingbym siew ïa ka tulop jong ki nongtrei kaba la kynjoh mynta sha ka 43 bnai kynthih.
Ïa kane la pyntip da u nongïalam ka TMC ka Dr. Mukul Sangma uba long ruh u Nongïalam ka Liang Pyrshah hadien ka jingleit ïakynduh ïa u Lat ka Jylla u CH Vijayashankar da kaba kyrpad ba un tuklar lem halor ka jingeh jong ki nongtrei hapoh ka GHADC.
“Lada ka Sorkar kam shimkhia ïa kaneka jingeh bad ban pynurlong ïa ka jingkitkhlieh katkum ka riti synshar ban weng ïa ki jingeh jong ka GHADC, ngim banse ban ïasnoh kti lang ha ka jingïakhih jong ki nongtrei jong ka GHADC,” la ong u Sangma ha ka jingïakren bad ki lad pathai khubor.
U la pynpaw ruh ïa ka jingsngewkhia halor ka jingbym don jingkitkhlieh jong ka Sorkar ïa ka jingeh jong ki nongtrei ka GHADC, kiba la pynlong ïa ka jingïakhih da kaba jaijai naduh ka 7 tarik, Naitung.
U la pyntip ba ki MDC ki la pynsngew ïa ki jingeh hapoh ka GHADC bad pynpaw ruh ïa ka jingbym don jingkitkhlieh jong ka Sorkar.
“Ki la kyrpad ïa u Lat ba un tuklar lem halor kane ka kam bad ki la kyntu ïa u ban pynsngew wat sha ki bor ba halor ha Delhi bad sha ka Ministry jong ka Sorkar Pdeng,” la bynrap u Sangma.
“Ki nongtrei ka GHADC kim shym la ïoh tukop la 42 bnai kynthih bad phi lah ban sngewthuh ïa ka jingshah ktah ha ka jingtreikam jong ka Council. Ïa kane ka ishu dei ban shimkhia bha bad ngi lah ban ïohi ba u Lat u la shahskhor ïa ka jingpynsngew jong ki MDC bad ki la aiti ruh ïa ka dorkhas ha u,” u la ong.
U MDC ka Kharkutta u Cherak W. Momin u la pyntip ba kane ka kynhun jong ki MDC ki la kyntu ïa u Lat ba un pyntreikam ïa ka iktiar jong u katkum ba la pynkupbor hapoh ka Para 16 jong ka Sixth Schedule ban khot pynlong ïa ka dorbar ba kyrpang jong ka Council ban ïatai sani halor kane ka jingeh kaba ktah ïa ki paidbah ka rilum Garo namarba dang shen ka dorbar ba ladep long jong ka Council kaba la shah pynthud la hap ban shu pynsangeh noh.
U la ong ba ki dkhot ki la dawa ïa u Lat ba un bthah ïa ka Sorkar Jylla ba kan bhah ïa ka mang pisa na ka bynta ban pynkhud ïa ka tulop kaba 42 bnai jong ki nongtrei ka GHADC, kaba pynlong ïa ki nongtrei mynta ban pynlong ïa ka jingïakhih bad kane ka la lam sha ka jingdkoh lut ka treikam treikam hapoh ka ophis jong ka Council.
Ki MDC ka TMC ki la kyntu ïa u Lat ba un bthah ïa ka Sorkar Jylla ba kan thaw ïa ka Meghalaya State Finance Commission, katkum ba la kdew ha ka Tripartite Agreement of 2014, khnang ban weng ïa ka jingeh ha ka pisa ka tyngka.
“Ngi la kyrpad ruh ïa u Lat ba un bthah ïa ka Sorkar Jylla ba kan pynbna noh ïa ka Garo Customary Law kum ka aiñ hapoh 8 bnai,” la bynrap u Momin.
Haba kylli, u MDC ka Kharkutta u la ong, “ngi sngewkmen ba u Lat u la shah skhor bad ngi kyrmen ba lyngba ka jingtuklar jong u yn sa lah ban weng ïa ki jingeh.”
Halor kawei pat ka jingkylli, u Momin u la pynkynmaw ha u snem 2015, ka tulop kaba dang sah ka long tang saw bnai.
“Naduh u snem 2015 haduh mynta, mano ban synshar ïa ka GHADC? Lada kin ong sa kumno kumno ruh, ka long kaba shai bha ba ha u snem 2015 haba ki shimti, ka tulop ba dang sahteng ka long tang saw bnai hynrei mynta ka la kynjoh sha ka 43 bnai,”u la ong haba dawa ïa ka Sorkar ban pynbeit mardor ïa kane ka jingeh na ka bynta ka jingmyntoi jong ka Council.
