Shillong, Risaw, 16: U Myntri Rangbah ka jylla u Conrad K Sangma u la pynbna ïa ka jingthmu ban pynkhlaiñ ïa ka jingshngaiñ ha ka jylla Meghalaya da kaba buh ïa ki CCTV bad ïa ki Local Command Centre.
“47 tylli ki shnong kiba la thmu ban pyndait ïa ki CCTV bad hynniew tylli kiba ladep ban pyndait bad kiba sah mynta ki long sa 40 tylli ki jaka ïa kiba yn sa pyntreikam hapoh kumba 60 sngi,” ong u Sangma ha ki nongthoh khubor hadien ba la wai ka jingïalang bad ki kynhun bapher bapher, kynthup ïa ki Rangbah Shnong bad ki nongïalam niam ban ïakren sani halor ka jingshim ïa ki lad ki lynti ban ïada ïa ka jingshngaiñ jong ki kynthei bad ki khynnah.
Haba pynpaw ba kan don ar bynta ka jingpyntreikam, u Myntri Rangbah u la ong ba ka bynta kaba nyngkong ka long ban buh ïa ki CCTV ha ki shnong bad ban buh ïa ki Local Command Centre kiba yn sa peit da ki Rangbah Shnong bad ki Dorbar Shnong.
“Ka Shillong Municipal Board ka la ithuh haduh 47 tylli ki jaka ban buh ïa ki CCTV, ha kaba kawei kawei ka shnong ka don lai haduh phra tylli ki jaka,” u la ong.
“Ka jingtrei ka la sdang, bad hynniew tylli ki jaka la pyndep, bad sa 40 tylli pat ki dei ban pyndep ha u bnai Naiweing ne Nohprah,” u la bynrap.
Ha ka bynta kaba ar, u Snagma u la ong ba ïa ki kamra ba la buh ïa ki CCTV yn sa pynïasoh bad ka Integrated Command and Control Centre (ICCC) kaba don ha New Shillong.
“Kine kin long kiba don ki jaka khmih ba lah ban rung da ki nongïalam shnong bad ka dorbar shnong bad ha ka bynta kaba bud yn sa pynïasoh shuh shuh ïa ki bad ka ICCC ha New Shillong,” u la ong da kaba bynrap, “ngin sdang na ki jaka sor kum ka Shillong, Tura bad Jowai bad nangta sha ki district headquater bad nangta sha kiwei kiwei ki jaka ruh.”
Haba kylli, u Sangma u la ong ba ka jingpyndait ïa ki CCTV ha ki skul yn sa ïakren shwa bad ki bor pynïaid skul kynthup ruh ïa ki Dorbar Shnong khnang ban pynthikna ïa ka jingshngaiñ jong ki khynnah skul.
U la ong ruh ba ka jingïalang ka la pynpaw ïa ka jingsngewkhia halor ki jingkynrei ki jingjia ba dang shen ha ki taiew ba ladep kaba pynsngewkhia wat ïa ka Sorkar.
“Kum ka Sorkar, ngi kwah ban shimkhia ïa kane ka mat bad ngi kwah ban pynthikna ban pynduna ïa ki jingjia da kaba ïatreilang khnang ban dup lah ban pynurlong ïa kata ka thong,” la ong u Sangma.
U la pyntip ba ka Sorkar ka la shimkhia ruh ïa ki jingai jingmut kiba kynthup ïa ka jingbuh shuh ïa ki Counseling Centre bad ban buh ïa ki Counsellor ban kyrshan ïa ki samla, ka jingpynsngewthuh paidbah halor ki mat kiba ïadei bad ki samla bad ki khynnah bad ban pynbha ïa ki Streetlight ha ki jaka ba donkam.
