Shillong, Lber, 31: Ka la mih ka jingïania kaba jur bha hapdeng ki dkhot ka Hynñiewtrep Integrated Territorial Council (HITO) bad uwei u nongtrei jong ka khyrdop khrong khajna ka tnat Forest ka Khasi Hills Autonomous District Council (KHADC) kaba don ha Puriang, East Khasi Hills District.
Ha u kyrwoh ba la phah da ka HITO ha ka Lah Sngi u Blei ryngkat bad ki video ba la ring hi da ki dkhot ka seng, la sakhi ba ka la mih ka jingïapyni nia kaba jur hapdeng ki dkhot ka seng bad u nongap khyrdop khrong khajna la kumba kin ïakynrup.
Ka HITO ka la kynnoh ba ki nongtrei jong ka tnat Forest ki lum khajna be-ain na ki kali bad la kynnoh ruh ba ki nongap khyrdop ki la dawa ban siew ïa ka pisa 5 hajar na kawei ka kali kit rnga bad nalor kata ki don ruh ki trok kit Clinker kiba la siew T.200 sha ki nongap khyrdop khrong khajna khlem da ai ïa ka rusit.
