Shillong, Nohprah, 06: U MLA ka North Shillong Constituency u Bah Adelbert Nongrum ha ka sngi Saitjaiñ u la pyllait paidbah ïa ka MLA Scheme hapoh ka Special Urban Work Programme (SUWP) na ka bynta u snem 2023-2024, 2024-2025 kaba kot 5 klur tyngka.
Ïa kane skhim u Bah Nongrum u la sam lyngba ki Work Order sha ki nongkitkam shnong, sha ki Seng Kynthei, ki Seng Samla, sha ki Sports Club bad ki kynhun bapher bapher kiba treikam ha ki shnong kiba hap hapoh ka jylli jong ka North Shillong Constituency ha ryngkat ka jingsakhi lang jong ki Rangbah Shnong na ki shnong bapher bapher.
Ha kane ka sngi u MLA u la pyllait ruh ïa ka website kaba lah ai kyrteng adelbertnongrum.info
U Bah Nongrum haba kren ha ka jingïalang kaba long ha Community Hall jong ka Dorbar Shnong Wahiingdoh u la kyntu ïa ki Rangbah Shnong ba kin peitngor khnang ba ka jingpyntreikam ïa ka skhim kan long kaba khuid bad kaba shai.
U la kyntu ruh ïa ki Engineer ka Shillong Municipal Board ba kim dei ban ai jem ha kaba pyntrei ïa ka kam.
“Kam pher la nga jop ne nga rem ha ka elekshon ngan pyrshang ïalade katba lah ban ai ka jingshakri kaba bha tam ïa ki paidbah. Khublei shibun eh ïa phi kiba la ailad ïa nga la ka long na ka bynta ban wanrah ïa ki song pynroi ne la ka long ha ki mat bapher bapher hapoh ka jylla Meghalaya,” u la ong.
