Shillong, Naitung 29 : Ka Sorkar jylla mynta ka la nang pynkhreh ban pynkylla noh kum ka jaka ïaid kjat ki paidbah ha Khyndailad, kaba dei kawei na ki jaka khaïi ba pawnam bha ha Shillong bad kane ruh ka long hadien ka jinglah ban pynkynriah noh ïa ki nongshong dukan madan sha ka MUDA parking lot ha kine ki sngi.
Haba pyntip halor kane hadien ka jingïalang ba la pynlong bad u Symbud Myntri Rangbah ka Tnad Pynroi Sor u Bah Sniawbhalang Dhar ha ka sngi Ba-ar, u Myntri ka Kam Jngohkai Pyrthei ka jylla u Bah Paul Lyngdoh ula ong ba ka Sorkar ka la shim ka rai ban pynïaid shakhmat ha ka ban pynkylla noh tang ka jaka ïaid kjat ki paidbah ha ka thaiñ Khyndailad.
Haba ïakren bad ki lad pathai khubor ha ka sngi baar u Bah Paul u la ong, “Kaba kham kongsan ka long ba ngi la rai ba ka jingpynkylla jaka ïaid kjat kan sdang noh mar mar bad ka por kan long naduh 7 baje mynstep haduh 9 baje mynmiet bad kan ym don satia kano kano ka jingïaid kali naduh ka lad ban rung sha Khyndailad haduh Umsohsun, lait noh tang ki kali kiba la ïoh ïa ki pass ki ban ai tang sha kito kiba leit buh skul ïa ki khynnah ha ka por long skul. Hynrei ha ki sngi shuthi, yn ym shah shuh ban ïaid kali lait noh tang ha ki khep kiba kyrkieh ne ki jingjia ki bym lah ban batai lypa kum ka jingpluh ding bad ka pang ka shitom.”
Halor kane u la ïathuh ruh ba ka Shillong Municipal Board kan sa ai shen ïa ki pass sha ki nongshong shnong ka thaiñ, ka ban shah ïa ki ba kin leit ki wan shala ïing ha ki kynta ba buh kaba long tang ban ïaid kjat ki paidbah.
U Myntri u la ïathuh ruh da kaba ong, “Halor kane, ngi la pynkhamti ha ka SMB ïa ka kamram ban lum ïa ki jingtip ïa ki briew kiba sah ha kane ka lynti ïaid kaba na Khyndailad shaduh Umsohsun, khnang ba ngin lah ban ai sha ki ïa ki pass jong ki kali. Kane kan long tang ïa ki briew ba sah ha kane ka thaiñ ym ïa ki briew kiba na shabar ka Khyndailad hynrei kiba buh dukan ha ka thaiñ.”
U Myntri ula pynpaw ruh ba ka Sorkar ka kmen palat ba ka Ïingkashari Meghalaya High Court ka la pynpaw ïa ka jingsngewhun halor ka rukom pynïaid ka Sorkar Jylla haba ïadei bad ka jingpynkynriah ïa ki dukan madan bad pynthikna ïa ka jaka kaba heh bad kylluid ïa baroh ki nongpyndonkam ïa ki surok bad khamtam ki nongïaid kjat ha kane ka jaka ïew ba kham paw ha sor.
Haba ïathuh pat bad kiwei ki jingthmu, u Bah Paul ula pyntip ba ka Sorkar ka la dep ban mang ban pyntrei ïa ka kam ha ka ban shna ïa 15 tylli ki paiñkhana (washroom) hakhrum jong ka MUDA Complex ka ban sa sdang noh mardor nalor ka jingpynbiang ïa ka umdih.
Ula pyntip ruh ba u Symbud Myntri Rangbah bad ma u, kin sa aiti dalade ïa ki cheque ba T.10,000 sha manla kiba shong dukan madan ha ka 5 tarik Nailar.
Haba kylli, u Bah Paul u la ïathuh ba ka jingjop ban pynkynriah ïa ki nongshong dukan madan ha Khyndailad, yn sa leh lang ruh kumjuh ha kiwei pat ki jaka ba khapngiah ka sor Shillong kynthup ha Laitumkhrah bad Civil Hospital point.
