Shillong, ïaïong, 05: Ka Friends Combine ka la long ka lahduh ha ka lympung ïalehkai First A&G Futsal Tournament kaba la sdang ha ka 15 tarik, Lber, 2025 bad kaba la kut noh ha ka 5tarik, Ïaïong,2025.
Ha kane ka Futsal Tournament ba la pynlong ha ka madan ïalehkai ha Mawlai Phudmuri la ïashim bynta da ki 32 tylli ki kynhun bad ka Friends Combine ka la ïakhun ha ka phainal pyrshah ïa ka Eco Squad. Ka jingïalehkai ka long shisha kaba itynnad ha kaba baroh artylli ki kynhun ki la ïaleh tyngeh bad ha kaba kut jong kane ka jingïalehkai ka Friends Combine ka la jop ïa ka Eco Squad da 1-0 kol bad ïoh khur syndon ïa ka song pisa kaba T. 50 hajar ryngkat bad ka trophy.
Ha kane ka sngi pynkut ba la sakhi lang da ka samla Dapalei Lina Wajri kaba la long kum ka kongsan ryngkat ka jingdon lang jong u trai ka madan ïalehkai Futsal u samla Steven Warjri bad ki bahaing hasem lem bad ki nongshah khot sngewbha la sam ruh ïa ki khusnam ba kynthup ïa ka nam Man off the Match, Best Player, Best Goalkeeper bad Top Scorer.
La pyntip ruh ba shen yn sa sdang sa ïa ka Super-5 ha kane kajuh ka madan ha kaba ka song pisa kan long 1 lak tyngka ïa ka kynhun kaba jop bad ïa ka Amateur Knockout Tournament ka song pisa kan long T. 20 hajar.
