Shillong, Jylliew, 04: Ka Kynhun Myntri jong ka Sorkar Jylla ha ka sngi Balang ka la mynjur ban pynkiew ïa ka jingsiew Honorarium bad ka Allowance ïa ka Chairperson jong ka Meghalaya State Commission for Women (MSWC) sha ka T. 50,000.
Hadien ba la wai ka jingïalang, u Myntri Rangbah ka Jylla Conrad K. Sangma u la ong ba la leh ïa kane da kaba wanrah ïa ka jingpynbeit thymmai ïa ka Meghalaya State Commission for Women Rules 2005.
“Ngi la rai ban kyntiew ïa ka jingsiew na ka T. 10,000 sha ka T. 50,000 ïa ka Chairperson, na ka T. 7500 sha ka T. 35,000 ïa ka Vice Chairperson bad na ka T. 5000 sha ka T. 20,000 na ka bynta ki dkhot,” u la bynrap.
Katkkum ka jingong jong u, ka jingkyntiew ïa ka jingsiew la leh katkum ka jingsiew Honorarium da kiwei kiwei ki jylla ha ka thaiñ Shatei Lammihngi.
Ha kane ka sngi, ka Kynhun Myntri ka la mynjur ruh ban thung ïa u Ophisar IAS ba la shongthait u Bah T. Lyngwa kum u Chairperson jong ka State Social Audit Council.
U Sangma u la ong ba ka jingjied ïa u Chairperson jong Council bad ïa ki dkhot la pynshong nongrim na ka jingai jingmut da ka Selection Committee ba la khlieh da u Chief Secretary ka jylla.
Ha kajuh ka por ka Kynhun Myntri ka la mynjur ruh ban pynbeit thymmai ïa ka Meghalaya Water Resources Engineering Service Rules.
