Shillong, Naitung, 24: Ka kynhun ba la ïalam da u Dr. K.C Boro, u MLA barim bad u Myntri barim ka jylla ka la ïakynduh kyrpang ïa u Lat ka Jylla u Phagu Chauhan ha ka sngi Balang ban pynsngew halor kawei ka jingjia kaba shyrkhei kaba ïadei bad ka jingshah leh be-ijot jong ki arngut ki khynnah kynthei riewlum kiba dei na ka jaidbynriew Koch kaba la jia ha ka 16 tarik, Ïaiong, 2024, ha ka shnong Ampati, South West Garo Hills District.
Ryngkat bad ki dkhot jong ka Meghalaya Koch Women Welfare Association (MKWWA), u Dr. Boro u la pynpaw ïa ka jingsngewkhia kaba jur halor kane ka jingjia bad u la aiti ruh ïa ka dorkhas ha u Lat.
Ki lanot ki la dawa ïa ka bailutksan 10 lak tyngka na ka Victim Compensation Scheme 2022.
U Lat u la sngap ïa ki jingeh jong ki bad u la pynthikna ban ai jingkyrshan bad ban ïarap ïa ki lanot da kaba pynbna ban ai jingïarap pisa T. 50,000 hajar na ka Discretionary Grant.
U Lat u la banjur ïa ka jingdonkam ban pynthikna ïa ka jingshngaiñ bad ka jingshngaiñ jong baroh ki nongshong shnong khamtam ki kynthei bad ki khynnah bad u la pynpaw ba dei ban shim ïa ki lad ki lynti kiba pyrkhing ban ïada na kum kine ki jingjia hadien habud.
U la pynthikna ïa u Dr. Boro bad ïa ka kynhun ba ïa kane ka kam un sa pynsngew sha ki bor ba dei peit ban leh mardor ïa kane ka kam.
