Shillong, Rymphang, 23: Ka Dorbar Shnong Mawbah bad ki dkhot ka Khasi Students Union (KSU) Mawprem Circle ha ka janmiet sngi Saitjaiñ ki la ïoh bat kumba 50 ngut ki bar jylla bad ki Muslim kiba wan na ka jylla Uttar Pradesh, West Bengal, Assam kiba thmu ban sah sop sop ha ka shnong Mawbah da kaba pynlong ïa ka Bilal Masjid kaba don ha shnong Mawbah kum ka ïing rieh tngen.
Ha u kyrwoh ba la phah da ka KSU bad ka Dorbar Shnong hapoh ka jingïalam jong u Rangbah Shnong u Bah Arisstone Thabah ryngkat ki nongïalam ka Seng Samla Shnong, hadien ba ki la ïoh jingtip ki la leit pynlong ïa ka jingtohkit hapoh ka Bilal Masjid bad lap da ki phew ngut ki bar jylla bad ïa ki Muslim kiba wan rung shapoh u pud u sam jong ka shnong khlem ka jingtip ong ka Dorbar Shnong bad hadien ba la bishar ïa ki kot ki sla la lap ba kim dei satia ki nongshong shnong ka Meghalaya.
U kyrwoh u la pyntip ruh haba la tohkit ïa ka jingthmu ba ki wan sha kane ka jylla ki la kam ba ki wan lum jingïarap ïa kaba ka Dorbar Shnong kam don jingtip satia namarba la shu leh ïa kane khlem ka jingtip jong ki bor synshar district bad la niew ruh ba ka long kaba shu leh beaiñ.
Hadien kane, ka dorbar Shnong ka la aiti noh ïa kine baroh sha ki Pulit ka Jhalupara Out-Post ban leh ïa kaba donkam bad hadien kane ki Pulit ka Jhalupara Out-post ki la pynkit bad pynphai noh sha ki jaka ba ki wan.
“Ka KSU Mawprem Circle bad ka Dorbar Shnong ki phah ïa u kyrwoh sha baroh ki nongshong shnong kiba marjan ba kin long kiba peit pyrman bha ïa kum kine ki briew ban ym ai jaka rieh ïa kine ki briew bad lada lap na ka liang ka seng bad ka Dorbar Shnong kan leh da kaba tyngeh bad ha kajuh ka por la maham ruh ïa ki nongpynïaid jong ka Masjid ba lada dang lap ba dang pynsah briew ka Seng ryngkat bad ka Dorbar Shnong kim banse ban khang shisyndon namar la plie ïa ka Masjid ban pynlong ïa ka jaka duwai bad mane ym ban pynlong jaka rieh tngen ki bar jylla,” la ong shuh shuh u kyrwoh.
