52 tylli ki takma khur ki nongïakhun kti ka MAWA ha ka National Arm Wrestling Championship

Shillong, Naitung, 14: Ka jylla Meghalaya ka la ïoh jingïaroh ha ka National Arm Wrestling Championship kaba la long ha ka nongbah Thrissur, jong ka jylla Kerala kaba la sdang naduh ka 28 tarik u Jylliew bad kaba la kut noh ha ka 2 tarik, u Naitung, 2025.

Ha kane ka rynsan ïakhun, ki 52 ngut ki dkhot jong ka Meghalaya Arm Wrestling Association ki la lah ban jop ïa ki jingïakop da kaba ïoh khur 52 tylli ki takma na ka bynta ka jylla.

Kane ka kynhun ka kynthup ïa ki 22 ngut ki kynthei bad bun ngut ki nongïakhun kti kiba ïashim bynta ha ki kyrdan bapher bapher, ba kynthup ïa ki Para Athletes, ki Masters, ki Junior, ki Youth bad ki Senior.

Na  kane ka rynsan ïakhun, kane ka kynhun ïalehkai jong ka jylla Meghalaya ka la lah ban ïoh khur 25 tylli ki takma ksiar, 15 tylli ki takma rupa, bad 12 tylli ki takma rnong bad nalor kata, ki para-athlete ki la lah ban leh kai bha ha kane ka rynsan ha kaba shiphew ngut na ki, ki la ïoh khur 14 tylli ki takma ksiar, lai tylli ki takma rupa bad kawei ka takma rnong.

Ha kane ka lympung ïalehkai, ka kynhun na ka jylla Meghalaya ka la jop ïa ka kyrdan kaba ar ha ka Overall Championship bad ïoh rung ruh ha ka kyrdan kaba ar kum ka Team Championship ha ka Master Men bad Women.