Shillong, Lber, 27: Ka iew mawkyrwat ka dei ka iew kaba la rim bha bad kaba la don naduh ka por jong ki syiem barim bad ka dei ruh ka iew kaba ym don satia kiwei pat ki jaidbynriew kiba nabar kajylla ba ha kane ka iew ki nongdie bad ki nongthied nongpet ki dei hi tang ki trai shnong bad ki trai ri trai muluk.
Hapdengkane ka iew la don uwei u rangbah uba shong die doh snam naduh u snem 1969 ha kaba wat ïa ka jylla Meghalaya ruh ym pat kha bad une u rangbah u dang ïaineh ha kane ka kam haduh mynta ki sngi .
Ngi la ïoh ban ïakren bad u Bah Khlipstar Marwein uba la don mynta 72 snem ka rta uba dei na ka shnong Mawlangwir, South Khasi Hills District bad mynta u shong u sah bad la ki khun ha ka shnong Mawten. U Bah Khlipstar u don 8 ngut ki khun, u long ruh u briew uba smat ba sting namarba u wan na ka longiing kaba duk.
Ha ka jingïakren bad Batesi Tv u Bah Khlipstar u la ïathuh ba ha ka banyngkong eh ïa ka kam die doh snam la sdang da u hynmen jong u hynrei u hymmen u la iehnoh ïa kane ka kam namarba u la hap ban leit pule noh. Kumta, u Bah Khlipstar u la sdang ban ieng ha la ki jong ki kjat da kaba die doh snam naduh ka por ba u dang khynnah, kata naduh u snem 1969 bad ha kata ka por u dang don tang kumba 13 snem ka rta. U la bteng beit ïa kane ka kam wat hadien ba u la shong kurim bad mynta la kumba 56 snem u dang ïai neh ha kane ka kam die doh snam.
Na ka jingïathuh jong u Bah Khlipstar, ha ki por ba mynshwa u ju ïoh ban shong die doh snam tang ha ki sngi iew bad ha kiwei pat ki sngi bym long iew ha iew Mawkyrwat, u ju leit bylla sngi bad kumne u im haduh ki sngi jinglong tymmen..
U Bah Khlipstar u la kyntu ïa ki khun samla jong ka jaidbynriew Khasi ba kim dei satia ban lehrain haba ki trei ïa kano kano ka kam namarba haba ki ieid ïa ka kam kaba ki trei ki hap ban long ruh kiba ïaishah watla ka long ka kam kaba rit hynrei kaba lah pat ban pyni kamai jakpoh.
