Shillong, Lber, 13: Ki Pulit ka Jylla Meghalaya kiba la trei shitom ban ïakhun thma pyrshah ïa ka jingjyllei jong u drok, ha ki lai bnai ba la leit noh, kata, ha u bnai Nohprah, 2024 haduh u bnai Rymphang, 2025 ki la ïohkem haduh 27 ngut ki nongkhaii drok,nongkhaii Ganja, ki nongkhaii dawai Kuli Yaba, ki nongkhaii dawai jyrhoh bad kiwei kiwei ki jait jingdih ba la khein beain ba kynthup ïa 21 ngut ki shynrang bad 7 ngut ki kynthei.
Na kine kiba la shah kem ha ki 8 tylli ki Case ki dei ki 10 ngut ki trai jylla na kane ka jylla Meghalaya, katba na ki 10 tylli ki case, 17 ngut kiba la shah kem ki dei na ka jylla Assam, Manipur, Tripura bad Mizoram ha kaba 11 ngut ki dei ki shynrang bad 6 ngut ki kynthei.
Ki 18 tylli ki Case kiba ïadei bad ka jingïohkem ïa ki nongkhaii drok bad ki nongkhaii Ganja bad kiwei kiwei ki jingdih pynbuaid ki dei kiba la register case ha ki 14 tylli ki Police Station kiba kynthup ha East Khasi Hills, 5 tylli ki case, ha East Jaiñtia Hills kawei ka Case, ha Ribhoi District 3 tylli ki case, ha West Garo Hills 5 tylli ki case bad ha South West South Garo Hills 4 tylli.
Katkum kane ka jingai jingkheiñ na ka tnat Pulit ka jylla, u drok ba la ïoh kurup u long 595.98 gram, u Ganja 53.446 kilo, ki dawai Kuli Yaba 1191.47 gram, ki dawai kuli Mescelline Tablets 101.37 gram bad 2 hajar bilor ka dawai jyrhoh.
