Shillong, Nailur, 02: Ka Sorkar Jylla kan sa mang pisa T. 6.6 klur ban ai jingkyrshan ïa ki 165 ngut ki samla kiba angnud ban bteng ïa ka jingpule ha ka B.Sc in Hospitality and Hotel Management ha ki san snem ban sa wan.
Ïa kane la pyntip da u Myntri ka tnat Jngohkai Pyrthei u Bah Paul Lyngdoh ha ka jingpynbna paidbah ïa ka Chief Minister Hospitality Scholarship Programme (CMHSP) ha ka sngi Baar.
U Bah Paul u la ong ba ka jingthmu jong kane ka prokram ai jingïarap ka long ban pynshlur ïa ka jingbteng ki samla ïa ki jingpule ba kham shalor ha ka Hospitality and Hotel Management, khnang ban kdew lynti bad ban plie ïa ki lad ki lynti ïa ki samla ha ki kam ki jam kiba ap shabar ka jylla.
“Kan don ka jingkyrshan bai pule kaba shispah persen na ka bynta ki samla kiba pule ïa ka B.Sc ha ka Hospitality and Hotel Management ha IHM Shillong,” u la ong ba 165 ngut ki samla pule yn kyrshan ha ki san snem ha kaba 55 ngut ki samla pule (uwei uwei na kawei ka Block) kin ïoh ïa ka scholarship ha ki lai tylli ki Batch ba ïa bud.
U la ong ba ki samla pule ki dei ban long ki nongshong shnong bapura ka Meghalaya, kiba la pyndep ïa ka Class-XII bad shim ïa ka sobjek English bad ka kamai kajih jong ki kmie ki kpa ha ka shisnem kam dei ban palat ïa ka T. 3 lak.
Kam don jingpyrkhing ha ka rta.
Ka jingjied ïa ki samla pule kan long katkum ka jingpas bha bad jingangnud ha kaba ïa ka rai ba khatduh yn sa leh da ka Selection Committee jong ka jylla.
“Ïa ka bai pule yn sa bei da ka sorkar Meghalaya ha kaba ka jingbei pisa ban ai jingkyrshan ïa ki 165 ki samla pule ha ki san snem ban sa wan kan long T. 6.6 klur,” u la ong.
“Kane ka mut ba ngi hap ban bei pisa kumba T. 3.6 lak tyngka uwei u khynnah,” la ïathuh Bah Paul.
Katkum ka jingong jong u, ki samla pule kin hap ban siew ïa ka bai sah hostel, ka bai bam, ki Uniform bad kiwei kiwei ki jinglut jingsep.
