Shillong, Ïaïong 04: Ka Kynhun Myntri jong ka Sorkar Pdeng hapoh ka jingpynïaid jong u Myntri Rangbahduh Narendra Modi ha ka sngi Thohdieng ka la mynjur ïa ka Vibrant Villages Programme -II (VVP-II) kum ka skhim jong ka tnad pdeng (100% ka jingbei tyngka na ka Sorkar pdeng), kaba pynjanai shuh shuh ïa ka jingkular jong ka na ka bynta ka jingthmu jong ka Viksit Bharat@2047 na ka bynta ka ‘Safe, Secured & Vibrant land borders’. Ka Prokram kan ïarap ban kyntiew ïa ki shnong kiba don ha ki block kiba marjan bad ki pud ki sam jong kiwei ki ri (ILB), lait noh u pud u sam jong ka thaiñ shatei lam mihngi ba la dep kynthup hapoh ka VVP-I.
Lyngba ka mang tyngka kaba kot T.6,839 klur, yn pyntreikam ïa kane ka prokram ha ki shnong ba la jied kyrpang ha ki Jylla/UT jong ka Arunachal Pradesh, Assam, Bihar, Gujarat, J&K (UT), Ladakh (UT), Manipur, Meghalaya, Mizoram, Nagaland, Punjab, Rajasthan, Sikkim, Tripura, Uttarakhand, Uttar Pradesh bad West Bengal haduh u snem mang tyngka 2028-29.
Ka jingthmu jong ka prokram ka long ban wanrah ïa ki rukom im ba kham bha bad ki lad kamai kiba biang ban pynthikna ïa ki thaiñ khappud kiba seisoh bad ba shngaiñ, ban tehlakam ïa ki kam beaiñ kiba palat ïa u pud u sam bad ban pynïasoh ïa ki nongshong shnong ha ki thaiñ khappud bad ka ri bad ai bynta ïa ki ‘kum ki nongpeit bad ki nongsngap jong ki bor pahara ïa ki jaka khappud’, kiba kongsan bha na ka bynta ka jingshngaiñ hapoh ri.
Ka prokram kan ai pisa na ka bynta ka jingkyntiew ïa ki jingdon jingem hapoh ka shnong ne ka kynhun jong ki shnong, ka jingkyntiew ïa ki kam (lyngba ki cooperative, ki SHG, bad kiwei kiwei), ka jingai jingtip ba kyrpang ha ki khappud, ki jingdon jingem ba ïadei bad ka pule puthi kum ki SMART class, ka jingkyntiew ïa ki jaka jngohkai pyrthei bad ki kam/projek ban wanrah ïa ki lad kamai jakpoh bapher bapher bad kiba ïaiñeh ha ki jaka khappud.
Ki jingïarap kin long katkum ki jaka khap pud, ki jylla bad ki shnong, katkum ki Plan Treikam jong ki Shnong ba la pynkhreh ha ka rukom ïatreilang.
Ka jingpynïasoh lyngba ki surok ba lah ban pyndonkam ha kano kano ka por na ka bynta kine ki shnong yn sdang hapoh ka PMGSY-IV kaba la dep mynjur hapoh ka MoRD. Ka Komiti ba la pynïaid da u Cabinet Secretary kan pyrkhat ïa ki jingpynlait kiba biang ha ki jingbthah ba la buh lypa na ka bynta ban pyntreikam hok ïa ki skhim ha ki jaka khappud.
Ka prokram ka thmu ban pynpoi lut ki skhim na ka bynta ka bha ka miat sha ki briew bad ki longiing ha ki shnong ba la ithuh hapoh ka jingpynïasoh lang katkum ki kyndon jong ka skhim. Ka prokram ka thmu ruh ban ai bynta ïa baroh ki shnong ha kum kine ki block ha ki 4 tylli ki bynta ba kongsan, kata ka jingpynïasoh lyngba ki surok ba lah ban pyndonkam ha kano kano ka por, ka jingpynïasoh telecom, ka jingpynïasoh telebishon bad ka jingpynpoi bording lyngba ka jingpynïasoh lang hapoh ki kyndon skhim ba la don lypa.
Ka prokram ka ban jur ban kyntiew ïa ka jinglong jingman ha kine ki shnong da kaba pynlong ïa ki prokram ba kynthup ïa ki fair & ki tamasa, ki awareness camp, ka jingrakhe National days, ka jingleit jngoh man ka por da ki Myntri, ki ophisar na ka Sorkar Pdeng bad sorkar Jylla/UT & ki jingsah miet ha kum kine ki shnong. Kane kan kyntiew ïa ka kam jngohkai pyrthei bad kyntiew ïa ka kolshor bad ka hiar pateng jong kine ki shnong.
Yn pyndonkam ïa ka teknoloji bad yn pyndonkam ïa ki jaka lum jingtip kum ka PM Gati Shakti na ka bynta ban pyntreikam hok ïa ka projek.
Ka VVP-II ryngkat bad ka VVP-I ka dei ka sienjam kaba wanrah jingkylla ban pynlong ïa ki shnong khappud kiba lah ban kyrshan dalade bad kiba khlaiñ.
