Shillong, Rymphang, 14: Ka ophis u District Transport Officer (DTO) East Khasi Hills da ka jingïatreilang bad ki bor synshar ka East Khasi Hills bad ka tnat Pulit ha ka sngi Balang ki la rakhe ïa ka National Road Safety Month 2024 ha nongbah Shillong.
Haba kren ha ka jingïalang, u Superintendent of Police (Traffic) u K. Prasad u la ong ba ka jingpynlong ïa ka National Road Safety Month ka long ban pynsngewthuh sha ki paidbah halor ka jingshngaiñ jong ki nongñiah kali bad ki nongshong kali hapoh ka jylla bad ha ka ri baroh kawei.
U la ong, manla u snem da ki hajar ngut ki mynsiem bakordor ki shu duhei tang ha ki jingjia aksiden bad ka daw ka dei na ka jingñiah kali khlemakor, ka jingñiah stet shaba palat bad ka jingbym burom ïa ka hok jong kiwei pat.
U la pyntip ruh ba ha u snem baladep, ka tnat Pulit ka la rejingster haduh 46 tylli ki case ba la jia ki aksiden kali ha kaba 40 ngut ki dei kiba ïap bad 15% kiba mynsaw jur.
“Tang ha u bnai Kyllalyngkot, 2024 ki (Pulit) la rejistar 6 tylli ki Case ha kaba hynriew ngut ki dei ki case ba la ïoh jingkheiñ ba ki briew ki la duhei ïa la ka jingim bakordor bad 13 ngut kiwei pat ki dei kiba la mynsaw jur.
U Prasad u la kyntu ïa ki paidbah ba ki dei ban da ñiah adkar bad ym ban ïaknieh ïaid khamtam ha ki surok ba khapngiah jong ka Sor Shillong.
“Ki nongñiah kali ki hap ban bat ha ka kti ïa ki jingkitkhlieh ym tang ïa ka jingim lajong hynrei wat ïa ka jingim jong kiwei ruh. Ki dei ban ñiah da ka jingphikir haba ki bat ïa u lakam ha ka kti,” la ong u SP (Traffic).
Ka Deputy Commissioner jong ka East Khasi Hills District ka Kong R.M Kurbah haba kren sha ki nongñiah kali halor ka National Road Safety Month ka la ong ba kane ka jingrakhe ka long kaba kongsan tam namarba ngi ïakren halor ka jingkordor jong ka jingim bad ngim dei hi ruh ban ïalehkai.
Ka la ong ba ka long kaba donkam bha ban pynlong kum ïa kine ki prokram manla ka por, ban ai jingpynsngewthuh halor ki hok bad ki kamram ba dei ban leh.
Ka Kong Kurbah ka la kyntu ïa ki kmie ki kpa ba ki dei ban don ïa ka jingkitkhlieh bad ban sneng ïa ki khun ïa kaei kaba ki dei ban leh bad ïa kaei kaba kim dei ban leh, namarba ki don ki khep haba u khynnah ne kiba la san ki shah tynrah haba ïaid lynti ka jingkitkhlieh hi ka dei beit jong u nongñiah kali.
Ha kane ka sngi, la sakhi lang da u District Transport Officer (DTO) u Bah R. Hinge bad kynthup ruh ki nongñiah kali kamai.
