Shillong, Jylliew, 26: Ka Kashari ha ka sngi Palei ka la aibor ïa ki Pulit ban set 6 sngi ha Police Custody ïa ki lai ngut ki briew kiba la shah kem halor ka jingpynduh pyndam ïa ki sakhi sabut ba kongsan kiba ïadei bad ïa ka jingshah pynïap u nongkhaii na Indore, u Raja Raghuvanshi, ha Sohra.
U Superintendent of Police (City) Bah Herbert Kharkongor, uba khlieh ïa ka Special Investigation Team (SIT), u la ong ba ïa ki lai ngut kiba la shah kynnoh la wanrah sha Shillong na Madhya Pradesh hadien ba la ïoh bor na ka Kashari bad mynta ka sngi hi la rah ban tian bishar hakhmat ka Kashari.
Ki lai ngut ki briew ki kynthup ïa u Lokendra Singh Tomar, uba sah ha Gwalior, Madhya Pradesh, uba dei u trai jong ka iingmala ha Dewas Na ka ba ka Sonam Raghuvanshi, kaba la shah kynnoh kum kaba donkti hakhmat eh ha ka jingpynïap briew, ka la sah katba ka dang riehtngen ha Indore. Ïa u Tomar la kem ha ka Lah Sngi u Blei halor ka jingpynduh pyndam bad ka jingbuhrieh ïa ki sakhi sabut ba kongsan.
Arngut kiwei pat kiba shah kynnoh ki long u Silome James, u nongkhaii uba la aiwai ïa kawei ka iing sha u Vishal Singh Chauhan, uwei na kiba la shah kynnoh bad u Balia Ahirwar, uba dei u nongap pahara uba ap pahara ïa ka iingmala. La kem ïa kine ki arngut ha ka sngi U Blei namar ka jingpynjot ïa ki sakhi.
U Bah Kharkongor u la ïathuh ba kine ki briew kiba shah kynnoh ki la pynduh pyndam ïa ki sakhi sabut kiba kongsan, kynthup ïa ka pla kaba don ïa ka laptop bad kiwei kiwei ki tiar bad ki la thang ruh ïa ka pla. Mynta ki Pulit ki dang pyrshang ban wad biang ïa ki tiar kiba la shah pynjot bad ban ban pynlong shuh shuh ïa ka jingtohkit kaba bniah.
Katkum ka jingong jong u SP, ki Pulit kin sa tohkit shuh shuh ïa kine kiba la shah kynnoh khnang ban tip thikna ïa ka jaka ba ki la bret ïa ka laptop.
U la pyntp ba ïa ki tiar ba la ïoh kurup la phah sha ka Forensic. “Katkum kane ngin sa ïohi ynda la wan ka kaiphod kiei ki dak kiba don ha kata,” u la ong.
U SP u la pynpaw ruh ba ka jingïoh kurup ïa ka pistol ka long katkum ka jingphla ha ka jingtohkit banyngkong eh ïa ki briew kiba la shah kynnoh donkti, kata, u Raj Kushwaha bad u Akash Rajput bad ka pistol ka long beain namarba kim don ïa ka Laisen.
Ki Pulit ki dang eksamin ruh la ka pistol ka dei kaba la pyndonkam neem kum shi bynta na ka jingthmu ban pynïap ïa u Raja. “Watla mynta ïa kata ym pat lah ban pynpaw ha ka jingshisha hynrei ïa kata ka bynta ngin sa bishar bniah,” bynrap biang u Bah Kharkongor.
Ka jingaibor ka Kashari ban set ha along ki Pulit hynriew sngi ka long ban tohkit ïa kiba la shah kynnoh bad ban ïoh shuh shuh ïa ki jingtip kiba bniah halor kane ka jingjia.
Haba kylli, u SP u la ong ba ki Pulit kim pat lap satia ïa ka mobile phone jong ka Sonam, kaba kam ba ka la pyndonkam haduh lai tylli ki mobible phone ha kaba ar tylli ladep ban pynjot.
