Shillong, Nailur, 02: Ka Iingbishar Meghalaya High Court ka dang peitngor bha ïa ka jingïaid shaphrang jong ki 6 tylli ki mukotduma kiba dang sahkut pyrshah ïa ki Member of Parliament (MP) bad ïa ki Member of Legislative Assembly (MLA) ha ka jylla.
Ka kaiphod ba la ai da u GA ka pyni ba ha East Khasi Hills LAI tylli ki mukotduma ki dang sah pongding, ar tylli hakhmat ki Judicial Magistrates Criminal Courts bad kawei ha kane ka Iingbishar, la ong ka Bench ba la khlieh da u Justice HS Thangkhiew ha ka hukum ba la pynmih ha ka sngi Baar.
Ka la ong, ha kaba ïadei bad ka West Garo Hills ki don 2 tylli ki mukotduma, baroh ar tylli kine ki mukotduma ki don mynta hakhmat kane ka Iingbishar, ha kaba ki hukum ba shipor ki dang treikam ban pynsangeh shwa ïa ka jingbishar ïa mynta shi por.
Kumba long ha kaba ïadei bad kawei ka mukotduma kaba dang sahteng ha West Jaiñtia Hills, ka dang don ha ka kyrdan ban pynshisha ïa ki sakhi bad mynta ka dang ïai bteng, namar naduh kata ka por ladep ban pynngat kyndon.
“Kumba la ïohi ba ki don 6 (hynriew) tylli ki mukotduma kiba dang sah pongding, la buh sngi ban shong bishar ïa kane ka kam ha ka 3 tarik, Naiwieng, 2025 na ka bynta ka kaiphod kaba bniah,” la ong ka Bench.
Ka Instant suo-moto case ba la ai kyrteng In-re: Ki iingbishar ba la jied na ka bynta ki MP/MLA ban buddien ïa ka jingpynduh noh la rejistar katkum ka jingbthah jong ka Ïingbishar Supreme Court kaba la pynmih ha ka 9 tarik, Naiwieng, 2023.
