Shillong, Naitung, 28: Ka jingshong syier jong ki nongshong shnong ka shnong Lapangap, ha West Jaiñtia Hills District ka la nang bteng ha kaba la kynnoh ba ki jaidbynriew Karbi ki la siat ïa ki Khasi Pnar da ki jri siat sim ha ka 27 tarik Naitung, 2025 bad da ka jingbitar ki nongshong shnong ka Lapangap ki la hap ban pynphai kylla ïa kane ka jingshah thombor.
U Waheh Shnong jong ka shnong Lapangap u Bah Deimonmi Lyngdoh u la ïathuh ba ka jingïasiat mar kylliang da ki jri siat sim na uwei u lum sha uwei u lum ka la neh kumba 60 minit eiei bad hadien ka jingtuklar jong ki Pulit ka Meghalaya bad ki Pulit ka Assam la lah ban beh noh ïa ki paidbah sha la iing.
U Bah Deimonmi u la ïathuh ruh ba kane jingïasiat ka sdang na ka liang jong ki Karbi ha kine ki shisngi arsngi ba la leit noh katba ki khynnah ki dang leit sum bad haba ki nongshong shnong jong ka Lapangap ki dang thmu ban leit jngoh ïa ki lyngkha bad ki pynthor rep kba.
Kumba ka long mynta, la shi bnai tam ki nongshong shnong jong ka shnong Lapangap kim pat ïohlad satia ban leit khmih ïa u kba uba ki la rep shitom namar ka jingsheptieng ïa ki Pulit Assam kiba la shna ktem ha u pud u sam jong ka shnong Lapangap bad nalor kata ki nongshong shnong mynmiet ki thiah da ka jinglynga mynsiem namar ka jingsheptieng ïoh ba ki Karbi kin pynjulor ïa u kba bad ïa ki iing trep ha lyngkha.
Ha kaba ïadei bad ka jingïohlad jong ki Pulit Assam ban thaw ktem ha u pud u sam jong ka shnong Lapangap, ka Dorbar Shnong ka la dawa ïa ka Sorkar Meghalaya ba ka dei ban weng shisyndon ïa ki Pulit Assam.
Halor kane ka jingjia, ki nongïalam jong ka Khasi Students’ Union (KSU) West Jaiñtia Hills District Unit bad ka Lapangap Unit ha ka Lah Sngi u Blei ki la aiti da ka dorkhas ha u Superintendent of Police (SP) ka West Jaiñtia Hills District u Jagpal Singh Dhanoa da ka jingkyrpad ban shimkhia ïa ka jingpynibor jong ki Karbi kiba ju siat da ka jri siat sim bad da ki khnam ïa ki paid Khasi Pnar kiba shong basah ha ka shnong Lapangap haba ki leit sha ki lyngkha rep bad haba ki leit sum ruh sha wah.
Ha ka dorkhas ka KSU ka la pyntip ha u SP ba ki nongrep ha ka shnong Lapangap ki la mad ïa ki jingshah pyndik naduh ka 25 tarik, Jylliew, 2025 ha ki katto katne ki jaidbynriew Karbi haba ki leit sha ki jaka rep.
Ka seng ka la kyrpad ruh ïa u SP ba un phah pahara ïa ki Pulit ha ki bynta jong ka shnong Lapangap khnang ban pynthikna ïa ka jingshngaiñ jong ki nongrep bad ban khanglad ruh ïa kino kino ki jingshah pyndik.
