Shillong, Jylliew 17: Ka sorkar jylla ka la mang T. 7.3 klur na ka bynta ban pynbha briew bad ban tei pynbha ïa ka Ward’s Lake khnang ba kan lah ban khring khambun ki nongwan jngohkai sha kane ka jaka.
Haba ïathuh ïa kane ha ka sngi baar, u Myntri ka tnat Tourism u Bah Paul Lyngdoh u la ong, “Lyngba ka tnat Urban Affairs, nga sngewbha ban pyntip ba ka pisa T. 7.3 klur la mang na ka bynta ban pynitynnad bad pynbha briew hapoh kane ka lake. Kane ka jingpynitynnad kan long ruh ban sumar ïa ka um kaba la tip da ka oxygenation.”
“Kum shi bynta ban kyntiew ïa ka Ward’s Lake kum kawei na ki jaka jngohkai pyrthei, na ka liang ka tnat kan sa shim ïa ki lad ki lynti ban pynbha ïa kane ka lake,” u la bynrap.
U Myntri ka tnat u la pyntip ba la dep pynmih ïa ka tender (NIT) bad hapoh ka 2 ne 3 taïew ki kam kin sa sdang noh.
“Shi sien ba la sdang ïa ka kam, ka jingpynkhuid bad ka jingpynbha briew ïa ka Ward’s Lake yn sa lah ban pyndep pura, bad ïa ka jingpynkhuid ïa ka um yn sa pyndonkam da ka technology kaba la tip da ka Nano Babla, ka ban ïarap ban pynim biang ïa ka um kaba don ha ka lake,” u la bynrap.
Na ka liang jong u Myntri u la ïathuh ruh ba ka pisa kumba T. 4 klur la mang na ka bynta ban sdang noh ïa kane ka kam.
“Ha shwa ban kut ka aïom slap ngin sa sdang ïa ka kam ban pynbha briew bad pynitynnad ïa ka Ward’s Lake bad ka pisa kumba T. 4 klur la dep ban mang bad kane ka kam kan sa sdang noh shen. Ki kam kin sa sdang ha u bnai Nailur ne Nailar bad kane ka project kan dep la kumno kumno ha ki 6 ne 8 bnai,” u la ong.
Shuh shuh u Bah Lyngdoh u la ong ba ka sorkar kan sa shim ïa ki lad ki lynti ban shna ïa ki jaka leitbar na ka bynta ki paidbah ha ki 10-12 tylli ki jaka ba khring ïa ki nongwan jngohkai.
“Malu mala ki la don kumba 10-12 tylli ki jaka ba la ithuh bad ka jingshna ïa ki jaka leitbar kin long ha ka jinglut kaba la mang kumba T. 25 lak kawei kawei ka jaka leitbar,” bynrap u Bah Paul.
One attachment • Scanned by Gmail
