Shillong, Naitung, 22: U Special Judge (POCSO) ka East Jaiñtia Hills District u la rai pynrem ïa u Shambhu Ray da kaba set phatok 7 snem ryngkat ka jingdaiñ kuna kaba T.30 hajar halor ka jingleh be-ijot ïa iwei i khynnah ba dang rit ka rta.
Ïa ka case la register ha Khliehriat Police Station (C/No. 27/04/2023) hapoh ka Section 5(m)/6 jong ka POCSO Act.
Ïa ka jingtohkit kaba la bniah la leh da u SI D.D. Warjri, bad la pynngat kyndon ha ka 11 tarik, Naitung,, 2023 (CS No. 19/2023).
Ka Kashari ka la hukum ruh ban siew bai lutksan T. 4,00,000 lak ïa i heprit lanot. Ïa ka pisa bailutskan yn peit da u Superintendent of Police ka East Jaiñtia Hills District.
U Special Judge (POCSO) jong ka East Jaiñtia Hills District u la rai pynrem sa ïa uwei pat uba la tip kyrteng kum u Peitlang Bamon halor ka jingdonkti ban leh be-ijot ïa iwei i heprit.
Ïa u Bamon la rai pynrem da kaba hukum ban shong along 4 snem bad 3 snem namar ki kam runar kiba lah ban pynshitom katkum ka kyndon 8 bad 12 jong ka POCSO Act, ryngkat bad ka kuna kaba T.20,000 hajar na ka bynta kawei kawei ka kyndon.
Ïa ka case la register ha Khliehriat Women Police Station (C/No. 32/08/2021) hapoh ka Section 7/8/11(1)/12/18 jong ka POCSO Act. Ïa ka jingtohkit kaba bniah la pynlong da ka WP-Inspector O. Tyngkan, bad la pynngat kyndon ha ka 6 tarik, Risaw, 2021 (CS No. 32/2021).
Ka Kashari ka la hukum ba dei ban siew bailutksan T. 1,50,000 sha i heprit lanot.
