Shillong, Jymmang, 13: Ka jaka theh ñuit ha ka shnong Umshangling kaba dei ka jaka pyllang ñuit jong ki paidbah nongshong shnong ka sor Nongpoh ka long kaba isaitmet bha ban peit namarba kam biang ka rukom pyntreikam katkum ka juk mynta.
La lap ïa kane ha ka jingleit jurip da ki lad pathai khubor ïa ka jaka theh ñuit.
Ka jaka theh ñuit ha Umshangling, Nongpoh, Ribhoi District ka dei kaba la pynïaid da ka Nongpoh Town Committee (NTC) bad ka dei ka NTC ka ban shim jingkitkhkieh na ka bynta ka khuid ka suba ban ïada ïa ka jingsaphriang ki jaboh jabaiñ ïa kaba la aiti da ka tnad Pynroi Sor ka Sorkar Jylla sha ka Nongpoh Town Committee ha u snem 2019 shwa ka khlam Covid-19.
Kane ka jaka bret ñuit ka la shlei da ki ñuit bad ka mashin kam shym la treikam naduh ba la plie da u Myntri Rangbah ka Jylla Conrad K. Sangma ha ka 13 tarik, Jylliew 2019 ha kaba la sakhi lang da u Bah Hamletson Dohling uba long u Myntri ka tnad Pynroi Sor ha kato ka por, u MLA ka Nongpoh Bah Mayralborn Syiem bad u MLA barim ka Umsning Bah Jason Mawlong.
Ka pisa ba la mang da ka Sorkar Jylla lyngba ka tnad Pynroi Sor ka long T. 7 klur naduh ka por Sorkar u Dr. Mukul Sangma bad ha ka por ka Sorkar MDA ba la ïalam da u Conrad K. Sangma la mang sa T. 1 klur.
Hynrei mynta ka jaka theh ñiut ka long kaba isaitmet bha namarba la ïohi ïa ka jingbret pathar ïa ki ñuit ki ñier khlem da pynïakhlad ïa ki ñuit kiba pyut bad ki bym pyut.
Shuh shuh ïa ka jaka theh ñuit ha Umshangling la shu ieh bad bret pathar da ki kali theh ñuit kiba kit ban pynpoi na ki shnong ki thaw ka sor Nongpoh la dei ki ophis Sorkar, ki jaka sumar bad ki hotel, restaurant.
Ha ka jingleit jurip ïa ka jaka theh ñuit, la shem kam long kaba biang la shu ieh lyngkrang wat lada ki bor Sorkar ki la bei pisa da ki klur. Hynrei ñiuma, ka Solid Waste Management Plant kam pat khlem trei kam namarba ka mashin kam pat tylliat wat tang iwei ruh i ñut haduh kine ki sngi kaba mut hynñiew snem kynthih kata naduh u snem 2019 haduh mynta 2025.
Uwei na ki nongshong shnong ka Nongpoh u Bah John Rymbai uba la leit ban tih bad khyllie ïa ka jaka theh ñuit ha Umshangling u ong ba kam long satia kumba long ka jaka theh ñuit ha Marten, kaba don ha Mawiong, Shillong.
Dang shen na ka jinglum jingtip da kaba leit jurip ïa ka jaka theh ñuit u la pynpaw ruh ha ki lad pathai khubor ïa ka jingtreikam jong ka Nongpoh Town Committee bad ka jaka theh ñiut.
Katkum ka khana ka Nongpoh naduh ki Snem 1995 ka la seng ïa ka Nongpoh Town Committee ha jingïalam ki Rangbah Raid kiba la khladnoh bad dang don kiba dang im haduh mynta. U Bah Nison Lyngdoh u la long u Chairman ba nyngkong jong ka Nongpoh Town committee bad u dang long u Rangbah Shnong jong ka shnong Mawroh, la ïathuh u Bah John Rymbai.
U Bah Rymbai u ïathuh ka jaka theh ñuit ha Umshangling ka dei ka jaka ba la ai da ka Dorbar Raid Nongpoh hapoh ka jingïamir jingmut lang jong ki Rangbah Shnong jong ki 19 tylli ki shnong.
Ha u snem 1995 ka Nongpoh Town Committee ka la ïoh jingithuh na ka District Council ha ka Establishedment Act of Town Commitee jong ka Distrct Council bad ki dkhot jong ka Nongpoh Town Committee ki dei ki Rangbah Shnong bad ki nongkitkam na ka Dorbar Raid Nongpoh.
