Shillong, Nailar, 5 : Ka Ka Khun Hynñiewtrep National Awakening Movement (KHNAM) ka pynpaw ïa ka jingsngewsih bad ka pynrem ruh ïa ka Sorkar Meghalaya haba ïoh ïa ka khubor ba ka Sorkar Meghalaya ka shim sting halor ka jingjia ha ka shnong Mukroh.
“Ka S.K Pukan (Retd) Commission of Inquiry kaba la thung kyrpang ban wad bniah halor ka jingjia ha Mukroh, ha kaba 5 ngut ki Khasi bad uwei u Forest Guard ka Assam ki la khlad noh ha ka jingïakynad ha Mukroh,” ong u kyrwoh na u Working President ka KHNAM u Bah Thomas Passah.
“Katkum ka jingbatai jong kane ka Commission ka ong ba wat hadien ba ka commission ka ladep khot ïa ka hearing ha ki bnai ba ladep ha Assam, kam pat don kano kano ka jingai jingthoh na ka liang ka sorkar Meghalaya haduh kine ki sngi. Ki jingthoh kiba ka Commission ka la ïoh pdiang la long tang na ka liang ka Sorkar Assam, ki bor District bad Pulit ka Assam bad na ki riewpaid bah na Assam,” ong u kyrwoh.
“Kane ka Commission ka la khot biang ïa ka Hearing ha ka 7 tarik, Nailar, 2023, ha ka por 10:00 baje mynstep ha Assam House Shillong, bad katkum ka Notis ka Commission ka la bthah ruh ïa ka Sorkar Meghalaya lyngba ka Sorkar Assam ban wanrah bad pynbiang ïa ka kaiphod, ïa ki kot ki sla bad ki sakhi ha kaba ïadei bad kane ka jingjia. Kane ka Commission ka la kyntu ruh ïa baroh kiba thmu ban ai jingtip/jingthoh ba kidei ba leh ïa kaba donkam khnang ba ïa ka jingbishar kan long kaba bniah. Ngi sngew ba ka dei ka kamram jong ka Sorkar ban ïarap lem ïa ki Khasi ki jong ngi kiba na ka shnong Mukroh kiba lah ban ai jingtip lane kiba long ki sakhi ha katei ka jingjia, namar ïoh tang na ka jingduk jingkyrduh lane ka jingbymtip kan pyndkoh ïa ka jingbishar kaba hok,” la ong shuh shuh u kyrwoh na ka KHNAM.
“Ngi la ïohi ïa ka jingïohbor bad jingleh shlur jong ki Karbi ha ki thaiñ khappud ha kaba ha Khanduli ki la pynieng ïa ka khyrdop lum khajana ha Khanduli bad haduh u pud ba ki la byrngem ia ki paidbah Pnar jong ngi ba kin ym bit ban thaw kynhun lane seng, haba ïa lade ki la thaw da ka seng lehnoh kumba la paw lyngba ki lad pathai khubor,” la ong u kyrwoh bad bynrap, “ka jingshah bthah jubor jong san tylli ki mynsiem briew ha Mukroh ha ka 22 tarik u Naiwieng 2022, hynrei ka long kaba sngewsih ban ïohi pat ïa ka jingkloi ban pjah na ka liang ka Sorkar bad baroh kiba la ïa pynpaw ïa ka jingpynrem bad jingbitar halor kane ka kam.”
“Lada ka Sorkar Jylla kan dang sngapjar ha kane ka jingkhot ka Commission ha ka 7 tarik Nailar, 2023 kan long kaba sngewsih ïa ngi lang baroh bad kaba ai mynsiem pat ïa ki Karbi ba kin leh katba mon bad pynïap ïa kat kiba ki kwah,” la ong shuh shuh u kyrwoh.
