Shillong, Lber, 26: Ka Kynhun Myntri jong ka Sorkar Jylla ha ka sngi Balang ka la mynjur ban thaw ïa ka Meghalaya Social Welfare Recruitment Board (MSWRB) na ka bynta ban pynstet ha kaba pyndap ïa ki post ba sah thylli hapoh ka tnat Social Welfare.
Haba kren sha ki lad pathai khubor, u Myntri ka tnat Social Welfare Bah Paul Lyngdoh u la ong ba ïa kane ka mat la ïathir sani bha namarba ka donkam kyrkieh ban pyndap noh ïa ki kam ba thylli na ka daw ka jingduna ki nongtrei hapoh ka tnat.
“Namarkata, khnang ban pynstet ïa ka kam ban pyndap ïa ki kam ba thylli, ka Kynhun Myntri ka la mynjur ban thaw ïa ka Meghalaya Social Welfare Recruitment Board,” u la bynrap.
U Bah Paul u la ong ba la bynshet ha ka Board ban shim ïa ki jingkitkhlieh bad ban pyntreikam noh mardor na ka bynta ban pyndap ïa ka jingduna ki nongtrei da kaba thungkam ha ki post bapher bapher. “Ïa mynta, ngi don haduh 62 ngut ki Lady Supervisors, ki bym pat thungkam bad 8 ngut ki Child Development Project Officer (CDPO) ba dang hap ban thungkam.”
Katkum ka jingong jong u, kane ka kam kan kham shim por na kaba la khmihlynti namarba ka jingslem ka long ba hap ban pyndap ïa kine ki kam da kaba ïaid lyngba na ka MPSC.
“Ban pynstet ïa kane ka kam, ka kynhun Myntri ka la mynjur ban thaw ïa ka Meghalaya Social Welfare Recruitment Board, ka ban khlieh da u Chairperson ha ka kyrdan Commissiner & Secretary ka Sorkar Jylla ha ka tnat Social Welfare bad u Director un long kum u Member Secretary,” u la bynrap.
