Shillong, Nailar, 26: Ka Sorkar Jylla ka la rai ban pynkynriah noh ïa ki 708 tylli ki kam Border Wing Home Guards sha ka State Disaster Response Force (SDRF) hadien ka rai jong ka ïingbishar kaba la pynlong ïa kine ki nongtrei ban shah pynrung kam.
“Ngi la mynjur ban pynrung ïa ki 708 tylli ki kam Border Wing Home Guard hapoh ka SDRF. Ïa kane la leh namarba ka la don ka rai jong ka iingbishar bun bun snem mynshuwa,” la ong u Myntri Rangbah ka jylla u Conrad K Sangma ha ka jingïakren bad ki lad pathai khubor hadien ba la wai ka jingïalang jong ka Kynhun Myntri ha ka sngi Baar.
U la pynbna ba ka Sorkar kan thung thymmai 708 ngut ki Volunteer ban pyndap ïa ki kam ba lait da kaba pyndonkam ïa ka pisa kaba ïoh na ka Sorkar India.
“…namar ba ngin pynkynriah noh ïa ki sha ka SDRF, kane kan sa pynmih ïa ka kam ba thylli kaba kot 708 ngut na ka bynta jong ngi ban shim kum ki Volunteer. Ngin shim 708 ngut namar kane ka pisa ka don bad ka Sorkar India…,” la ong u Sangma.
U Myntri Rangbah u la pynthikna ruh ba katkum ka rai jong ka ïingbishar, ka Sorkar kan shim ïa ki lad ki lynti kiba donkam ban pynthikna ba kum kine ki jingjia kin ym mih shuh hadien habud.
