Shillong, Jylliew 20: Ka Kong Persha Kharkongor ka la phah ka jingujor ba ha ka 17 tarik mynta u bnai, ki runar bym lah ban ithuh ki la prong hapoh ka ïing jong ki kaba ha Lawsohtun Block-V, Shillong bad ki la ïoh rong tuh ïa ka pisa kumba T. 71,000.
Ka Kong Larihun Dohling ka la ujor ba ha ka 2 tarik mynta u bnai, ki runar bym lah ban ithuh ki la tuh ïa ki waïar napoh ka Conditioner Unit jong ki kaba ha Police Bazar, Shillong.
U Maynal Hoque u la phah ka jingujor pyrshah ïa u nongtrei technician ka JIO ba kyrteng Wahidur Islam, da kaba kynnoh ïa u ba u la pynjulor ïa ki tiar Jio tower na Diblongagre kaba dang hab ha Gambegre OP (WGH).
Kawei ka longkmie kaba sah ha Tura (WGH) ka la phah ka jingujor ba ha ka 12 tarik mynta u bnai, ka la lap ba ki runar bym lah ban ithuh ki la thaw ïa kawei ka ‘Facebook account’ kaba thok ha kaba la pyndonkam ïa ki dur, ki video bad kumjuh ruh ki la pynlehraiñ ïa ka.
Uwei u nongshong shnong ka West Garo Hills u la phah ka jingujor ba ha ka 10 tarik mynta u bnai u la aplai loan halor ka Digital Lending platform (Bajaj Finance). Hynrei tang hadien khyndiat por u la ïoh pdiang ïa ka jingshah phone ha kaba uba phone u la kam ba u dei na Bajaj Finance Pvt. Ltd., company bad u la pyntip ruh ba la mynjur ïa ka jingshim ram jong u bad u la kyntu ba dei ban siew pat ïa ka pisa kumba T. 16,005/- ha kaba u la siew. Kham hadien utei u nong phone u la ong biang ïa u ban siew sa T. 5,200/- ha kaba ïa kane ruh la kam ba dei na ka juh ka company; halor kane utei uba la ujor u khlem pdiang shuh ïa katei ka jingdawa jong ki hynrei la shah pan pynban ïa ka ATM card jong u bad ki jingtip ba bniah halor ka Internet Banking, ha kaba ïa kane ruh u la kyntait.
Kawei ka longkmie kaba sah ha Tura (WGH) ka la phah ka jingujor ba ka la ïohpdiang ïa shibun ki jingshah phone ha kaba une uba phone u la pyntip ba u dei u nongtrei ka SBI Bank, Mumbai (Maharashtra) bad u la thok kumba T. 2.76 lak, halor ka jingai daw ban ai ram ïa ka kumba T. 5.5 lak.
