Shillong, Jylliew, 04: Ka Kynhun Myntri jong ka Sorkar Jylla ha ka sngi Balang ka la mynjur ïa ka jingtyrwa ban thied jaka shuh shuh sa 6 akar khnang ban ïoh pynheh ïa ka surok pynher liengsuin ha Shillong Airport kaba don ha Umroi.
Ha ka jingïakren bad ki lad pathai bor hadien ba la wai ka jingïalang, u Myntri Rangbah ka Jylla Conrad K Sangma u la pyntip ba na ka jaka kaba 11.75 akar kaba donkam ban pynherh ïa ka surok pynher liengsuin, kumba 4.3 akar ka dei kaba hap ha ka jaka jong ka tnat Ïada Ri bad kumba 6 akar tam ka jaka ka dei kaba dang donkam ban thied na ki trai jaka kiba don markham bad ka kad liengsuiñ.
“Namarkata, la thaw ïa ka komiti ba la khlieh da u Deputy Commissioner, ban pynlong ïa ka jingïakren bad ki trai jaka khnang ban shim rai khatduh ïa ka dor ka mur bad ban siew ïa ka bai lutksan sha ki trai jaka. Hadien ba la ïathir sani bha, la mang pisa T. 72.17 klur ban siew bailutksan na ka bynta ka jaka, ïa ki dieng, ki mar rep, ki ing ki sem khnang ban ïoh pynheh ïa ka surok pynher liengsuiñ,” la bynrap u Sangma.
