Shillong, Nailur, 08: U Myntri ka tnat Sam Bording ka Jylla u Abu Taher Mondal ha ka sngi thohdieng u la ong ba ka Preliminary Report ba la ai da ka Indian Institute of Technology (IIT) Guwahati ka pynpaw ba ka jingkieng ha Pung Umïam ka dang shngaiñ bad donkam ban bujli tang ha ki Bearing jong ka jingkieng khnang ban pynjlan ïa ka jingskhem jong ka jingkieng.
Ha ka jingïakren bad ki lad pathai khubor, u Mondal u la ong ba ka IIT Guwahati ka ladep pynlong ïa ka jingtohkit bniah ïa ka jingkieng ha Pung Umïam bad ka tnat mynta ka dang ap sa ïa ka kaiphod.
“Katkum ka preliminary report, ki la ïathuh ba ka jingkieng ka dang shngaiñ bad tang ïa ki Bearing jong ka jingkieng la donkam ban pyndait bujli noh da kiba thymai. Ngi la thied na ka kompeni kaba shna ïa kine ki Bearing bad la aiti sha ka kynhun kaba ju trei ïa kine ki jait kam ban pyndait ïa ki bearing,” u la ong.
U la ïathuh ba ladep thaw ïa ka Joint Committee hapdeng ki Engineers jong ka Meghalaya Energy Corporation Limited (MeECL) bad ka Public Works Department (PWD) ban bishar ha kaba ïadei bad ka jingshna pynbha ïa ka jingkieng ha Pung Umïam.
“Shen kin sa phah ïa ka kaiphod halor kane ban ïathir ïatai sani para ma ngi bad lehse yn sa rah ruh ha ka Kynhun Myntri kumno ban pyntyllun shakhmat ïa ka kam,” u la ong.
U Myntri u la ong ruh ba yn sa pynbna paidbah ïa ka tarik ha ki sngi ban maramot ïa ka jingkieng lane ban bujli ïa ki Bearing.
“Ha ki sngi ba la pyndait bujli ïa ki bearing yn hap ban pynsangeh ïa ka jingïaid kali bad yn ym shah satia ïa kino kino ki kali ban ïaid lyngba la kumno kumno haduh 8 kynta eiei. Hadien ka 8 kynta, yn shah tang ïa ki kali rit ban ïaid lyngba na ka jingkieng bad ha ka sngi ba la pynhiar ïa ka jingkieng, yn ym shah ïa ki kali ban ïaid lyngba na ka jingkieng. Hadien ba la pynhiar ïa ka jingkieng ha ka jaka ba la pynshong bha yn sa ailad pat ïa ka jingïaid kali kumba ju long,” la ïathuh u Myntri bad bynrap ba ha kine ki kynta, yn ym shah ïa ki kali ban ïaid lyngba na ka jingkieng.
