Shillong, Jylliew, 11: Ka Kashari Chief Judicial Magistrate (CJM), East Khasi Hills ka la ai bor phra sngi ïa ki Pulit ban set ha along ki Pulit ïa ka Sonam Raghuvanshi bad saw ngut ki paralok jong ka kiba donkti ban pynïap ïa u Raja Raghuvanshi, u nongjngohkai pyrthei na Indore, Madhya Pradesh ha Sohra.
U Superintendent of Police ka East Khasi Hills Bah Vivek Syiem ha ka jingïakren bad ki lad pathai khubor ula ïathuh ba baroh san ngut ki nongleh kam bymman kin shah set phra sngi ha along ki Pulit.
Ïa ka Sonam la kem na Uttar Pradesh hadien ba ka la leit pyndem ïalade ha Nandganj Police Station ha Ghazipur District katba saw ngut kiwei pat kiba kynthup ïa u Raj Khuswaha (21 snem), Akash Rajput (19 snem) na Lalitpur, u Vishal Singh Chauhan (22 snem) bad u Anand Kuli (23 snem) la kem na Indore.
Ïa kine ki san ngut la rah tian bishar ha Kashari hapdeng ka jingpahara jong ki Pulit.
“Ka jingtohkit kan sdang noh shen. Ngi la pan por 10 sngi ban ïoh tohkit ha along ki Pulit (hynrei ka kashari ka la ai bor 8 sngi) bad lada donkam, ngin sa kyrpad ïa ka Kashari bann pynjlan ïa ka jingset along,” la ong u SP.
Da kaba kyntu ban kiar na kano kano ka jingkynnoh bym don nongrim, u SP u la ong, “Ki don shibun kiei kiei. La leh ïa ka jingtohkit ba nyngkong ha kito ki jylla; ki lah ban pynpaw eiei hynrei kine kiei kiei ki donkam ban pynshisha bad pynskhem bad donkam ban kyrshan da ki sakhi.”
Haba kylli, u SP u la ong ba haduh mynta tang san ngut kiba la shah kem halor kane ka kam pynïap briew.
“Katba nang ïaid ka jingtohkit, ngin sa lah ban pynthikna la ki dei tang kine ki briew kiba donkti ne kin dang don sa kiwei pat kiba donkti,” u la bynrap.
U SP u la ïathuh ba ïa ki 5 ngut yn ym rah sha Sohra lashai ka sngi namarba kin hap ban eksamin bad tohkit shwa ïa ki thik pa thik. U la ong ba ka Special Investigation Team kan sa rai ïa ka sngi lano kan leit ïalam ïa ki san ngut sha ka jaka ba la jia ka jingshah pynïap (u Raja Raghuvanshi).
Shuh shuh u Bah Syiem u la ong ba katkum ka medical report ka pynpaw ba ka Sonam kam pat armet satia.
“Hynnin ka sngi, la ïalam ban leh ïa ka medical check-up kaba bniah ïa ka Sonam ha Ganesh Das hospital bad ka paw ba kam shym la pun khun). Sa shisien, kin sa peit bniah biang ïa ka hadien 24 kynta,” u la ong bad bynrap, “ki kaiphod ba la antad (shaphang ka jingpun khun) hynrei hap ban pynthikna ïa ka jingshngain bad ki lad jingïada ba ngi hap ban shim khnang ban pynthikna ïa ka koit ka khiah jong ka.”
Katkum ka jingong u SP, kiwei pat ki saw ngut kiba la shah kynnoh la eksamin da u doktor ba la register tang ha Sadar Police Station. Lah ban eksamin ïa ki da kino kino ki doktor ba la pynrung kyrteng da ka sorkar.
“Tang shu ïoh ïa ki sakhi ba biang ha kane ka kam bad hadien ba ngi la tohkit ïa ki nangta ngin sa ïalam ïa ki sha Sohra khnang ban pynthikna mano ba leh bad kumno ka jia. Hadien ba ngi la pynthikna ïa ka bynta jong ki baroh nangta ngi sa lah ban lap ïa ki jingshisha baroh,” u la bynrap.
Shuh shuh u SP u la ong ba ka jingtohkit ka dang shu sdang bad ynda ki Pulit ki la tohkit bniah yn sa tip mano ba donkti lang ha kane ka kam.
“Hooid, ka (Sonam) ka donkti. Ïa ka jingphla lah ban ai tang ha ka iingbishar. Hadien ba la tohkit ngin sa lah ban tip haduh katno ka jingdonkti jong ka bad ban pynthikna ïa ki jingtip ba bniah shaphang ka jingdonkti jong ka,” u la ong bd bynrap ba ïa ka “jingtip ba bniah” yn sa pynthikna hadien ba la tohkit.
“Ki paidbah nongshong shong jong ka Sohra kim ju leh donbor. Nga la ong teng mynshwa haba don kum kine ki jingjia kiba sniew ki ju mih ban ïarap wad lang bad ki ïarap ban ai jingtip bad ki la ïatreilang bad shet jingbam na ka bynta ka kynhun kaba wad bad ngam ïohi ïa kano kano ka jingma hynrei watla katta ki briew ki hap ban shim ïa ki lad jingïada.”
