Shillong, Jylliew, 13: Ka Khasi Students Union (KSU) ka la ai jingmut halor ka jingpynbeit thymmai ïa ka State Reservation Policy ban ïasam marbiang na ka bynta ki lai tylli ki jaidbynriew-Khasi, Jaiñtia bad Garo jong ka jylla.
Ha ka shithi ba la phah sha ka Expert Committee on the State Reservation Policy ba la lamkhmat da u Justice (Retd.) u MC Garg, ka KSU ka la ong, ki jingai jingmut ki long da kaba bishar bha ïa ka jinglong jingman ha ka jingbun paid, ka ïoh ka kot, ka pule puthi bad kumjuh ruh ïa ka jinglong jingman ha ka jingsngew pher hapdeng ki paid Khasi bad Garo. Ka KSU ka la pynwandur ïa kine ki jingai jingmut da kaba ngeit skhem kan ym pynsngewsih ne pynduh nong ïano ïano ruh hynrei kan wanrah malu mala ïa kata ka hok ba dei ban ïoh da ki trai ri trai muluk jong baroh kawei ka jylla.
“…katkum ka khanasamari 2011 ka Jylla Meghalaya ki jaidbynriew Khasi bad Jaiñtia ki don kumba 14.1 lak ngut bad tang ki Garo ki don palat 8.21 lak. Namarkata, kane ka pynpaw shai ba la donkam ban pynbeit ïa ka State Reservation Policy khnang ban pynthikna ba ka don ka jingïabiang lang hapdeng ki jaidbynriew Khasi-Jaiñtia bad Garo,” la ong ka KSU.
Ki san tylli ki mat kiba ka KSU ka la ai jingmut sha ka Expert Committee ka long, (i) katkum ka Reservtion Policy kaba la treikam naduh u 1972, ka jingbhah thungkam na ka bynta ki Khasi-Jaiñtia ka long 40 na ka 100 bad ïa ki Garo ka long 40 na ka 100. Ïa kaba sah 20% pat la mang 5% sha kiwei pat ki ST bad SC katba kaba 15% pat ka dei na ka bynta baroh kiba sah ha Meghalaya khlem da kheiñ jaidbynriew. Ka KSU ka buh hakhmat ka Sorkar ba ladei ban pynbeit noh khyndiat ha ka rukom bhah ïa ka thungkam thungjam namar ka jaidbynriew Khasi ka kham heh paid bad ïa ka jaidbynriew Garo. Kumta ka ai jingmut ba na ka 100%, dei ban mang noh 50% ïa ki Khasi (Khynriam, Pnar, Bhoi, War, Maram bad Lyngngam), hynrei to ai ba ka jong ki paid Garo kan neh kumjuh kata 40%. Kaba sah pat, kata 10%, yn phiah noh 5% sha kiwei pat ki ST/SC ka jylla bad 5% pat kan dei ka bym mang ïano ïano ruh hynrei kaba plie ïa baroh ki nongshong shnong ka jylla.
(ii). Ka KSU ka ïohi ba ka jylla Meghalaya la bynta ha ki ar thaiñ, kata ka Garo Hills kaba bun paid ki Garo bad ka Khasi-Jaiñtia Hills kaba bun paid da ki Khasi (Khynriam, Pnar, Bhoi, War, Maram bad Lyngngam). Kumta ha kaba ïadei bad ka thungkam ha ki District Level, ka KSU ka ai jingmut ba shu buh lada ym don Khasi ba thep kam ha ki post ba lait ha Garo Hills, ka mut 90% dei ban mang beit ïa ki Garo. Kumjuh ruh ha Khasi-Jaiñtia Hills lada duna ki Garo ba thep kam ha ki post ba lait ha ki districts Khasi bad Jaiñtia, 90% dei ban mang beit noh sha ki Khasi-Jaiñtia.
(iii). Ka KSU ka ai jingmut ruh ba lyngba ka Reservation Policy bad ka Roster System ba thymmai ym dei shuh ban phaidien (retrospective) sha ki jingduna ïohkam jong kano kano ka jaidbynriew hynrei ban ïaid beit sha khmat (prospective) katkum ka bhah ba la mang thymmai.
(iv). Kawei ka mat ba ka KSU ka sngewdei ka long halor pule puthi ha ka Secondary Level ha ki skul bapher bapher. Kane ruh kumjuh kum ka mat kaba ar hi ha kaba ïadei bad ka jingphiah ïa ka jylla ha ki ar bynta. Ka KSU ka ai jingmut ba lada hap ban khamtam kyntiew shuh shuh ïa ka pule puthi khamtam ha thaiñ nongkyndong donkam ban mang beit 100 na ka 100 ïa ki kam hikai sha ki Garo ha Garo Hills bad 100 na 100 ïa ki Khasi-Jaintia ha Khasi bad Jaiñtia Hills.
(v). Kawei ka mat kaba pyntyrha eh ïa ki samla wad kam wad jam ka dei kata kaba ki ong ka Backlog Reserved Vacancies. Ka KSU ka sngewdei ban hap ban pynduh noh ïa kane ka rukom namar ka ktah ym tang ïa ki samla wad kam hynrei wat ïa ka rukom treikam ka Sorkar Jylla. Kum ban shu ai nuksa lada ki Khasi-Jaiñtia kim lah ban pyndap ïa la ka 50% ha ki kam kiba lait, ïa kine ki kam kiba sah ym dei ban rah kum ka Extra Percentage sha ki Advertisement kam kiba hadien. Kumjuh ruh lada ki Garo kim lah ban pyndap pura ïa ka 40%, ïa ki % ba sah ym dei ban pynkylla plus % sha ki Advertisement kam kiba hadien. Hynrei ïa kito ki kam kiba ym lah ban pyndap pura la ka dei ka bhah ki Khasi-Jaiñtia ne jong ki Garo, dei ban khot Advertisement bad pynlong eksamin biang da kaba thymmai bad bud ïa ki kyndon ka Reservation Policy ba thymmai kata 50:40.
